Sesaun plenária Parlamentu Nasionál. Imajen dok. Tatoli

DILI, 23 outubru 2019 (TATOLI)–Deputadu bankada Partidu Congresso Nacional da Reconstrução de Timor (CNRT), Partidu Libertasaun Populár (PLP) no FRETILIN la konkorda atu iha eleisaun antesipada (EA).

“Ba eleisaun antesipada ami iha esperiénsia ona. Maibé, ami konsidera ida-ne’e deklarasaun pesoál Primeiru-Ministru nian de’it”, dehan Xefe Bankada CNRT, Duarte Nunes, iha resintu Parlamentu Nasionál, kuarta ne’e.

Nia dehan, oras ne’e, Konsellu Diretiva Aliansa Mudansa Ba Progresu seidauk ko’alia kona-ba EA.

Lee mós: Laiha Dalan ba Membru Governu Pendente, Bele ba Eleisaun Antesipada

Xefe Bankada CNRT deklara, CNRT sei la troka ema na’in hitu ne’e–mantein nafatin to’o hakotu mandatu Oitavu Governu Konstitusionál.

Entretantu, Deputadu PLP, Sabino Soares ‘Guntur’ dehan oras ne’e VIII Governu la’o di’ak hela.

“Bainhira Parlamentu sei forte, eleisaun antesipada sei la akontese. Prezidente Repúblika laiha kompeténsia deklara eleisaun antesipada, maibé tenke iha kondisaun ruma hamosu eleisaun ne’e. Entaun, kondisaun mak iha Parlamentu”, dehan deputadu Guntur.

Nia fiar katak Parlamentu sei sólidu, tan ne’e EA sei la akontese.

Nia konsidera deklarasaun Primeiru-Ministru, Taur Matan Ruak hanesan preokupasaun ba impase polítika ne’ebé naruk.

Sabino subliña, Governu ne’e forma hosi partidu CNRT, PLP no KHUNTO, maibé kuandu hanoin EA partidu tolu ne’e tenke tuur hamutuk ko’alia.

“Kuandu bloku AMP nakfera iha Parlamentu, ne’e maka fó vantajen ba Prezidente Repúblika deklara eleisaun antesipada. Daudaun ne’e, AMP sei sólidu”,  nia haktuir.

Iha parte seluk, Vise Prezidente Bankada Parlamentár FRETILIN, Francisco Miranda Branco, hateten la nesesáriu atu hamosu EA.

Nia dehan, ukun-na’in sira tenke iha kapasidade rezolve problema no presiza sukat impaktu moris povu nian.

“La’ós fásil deklara eleisaun antesipada. Povu mós bele sente katak afinál ami votu ba imi, imi la rezolve ami-nia problema. Imi la konsege ultrapasa tantu polítika, ekonomia no sosiál. Ne’e inkapasidade hosi ita-nia ukun-na’in sira”, dehan Branco.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here