Prezidente Konsellu Diretivu Nasionál Partidu CNRT, Dionísio Soares Babo. Imajen/TATOLI

DILI, 23 outubru 2019 (TATOLI) – Prezidente Konsellu Diretivu Nasionál Partidu Kongresu Nasionál Rekonstrusaun Timor (CNRT-sigla Portugés), Dionísio Soares Babo, hateten CNRT iha kompromisu atu lori Governu Aliansa Mudansa ba Progresu (AMP) to’o rohan 2023.

“CNRT iha kompromisu nafatin atu lori Governu ida ne’e to’o rohan tanba ita-nia nasaun ne’e presiza dezenvolvimentu no ita-nia povu presiza hakmatek. CNRT nia hanoin lakoi halo mudansa tenke la’o nafatin tuir buat ne’ebé iha no konfiansa husi povu,” tenik Dionísio iha Palásiu Governu, kuarta ne’e.

Atuál Ministru Negósiu Estranjeiru no Kooperasaun ne’e, ko’alia asuntu ida-ne’e relasiona ho deklarasaun Primeiru-Ministru (PM), Taur Matan Ruak, ne’ebé mak dehan bainhira laiha solusaun ba membru governu pendente maka tenke hakat fali ba eleisaun antesipada.

Notísia Relevante: Laiha Dalan ba Membru Governu Pendente, Bele ba Eleisaun Antesipada

Nia subliña, Timor-Leste presiza dezenvolvimentu no povu mós presiza moris iha hakmatek nia laran, tanba ne’e partidu CNRT hakarak VIII Governu Konstitusionál labele monu no pozisaun partidu maka nafatin mantein pozisaun tuir orientasaun polítika.

“CNRT nunka hanoin to’o iha ne’ebá. CNRT nia pozisaun la’o tuir nafatin mandatu ne’ebé povu fó ona,” nia akresenta.

Notísia Relevante: Deputada Olinda Kontinua Ezije Rezolve Membru Governu Pendente

Koligasaun AMP kompostu husi Partidu CNRT, Partidu Libertasaun Populár (PLP) no kmanek Haburas Unidade Nasionál Timoroan (KHUNTO), asina memorandu entendimentu hodi sai pakote úniku iha loron 1 fevereiru 2018 molok hakat ba eleisaun antesipada.

Iha loron 22 fevereiru 2018, partidu tolu ne’e halo konferénsia ida-idak hafoin iha tuku 15.00 iha Sentru Konvensaun Dili (CCD), halo konferénsia hodi hamosu deklarasaun konjunta ba koligasaun.

Iha loron 22 juñu 2018, Prezidente Repúblika, Francisco Guterres Lú Olo, fó pose ba VIII Governu Konstitusionál, ne’ebé lidera husi Primeiru-Ministru, Taur Matan Ruak, iha serimónia ne’ebé hala’o iha Salaun Nobre Palásiu Prezidensiál Lahane, Dili.

VIII Governu Konstitusionál forma husi koligasaun partidu tolu hanesan CNRT PLP no KHUNTO.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here