Tribunal Distritál Dili.

DILI, 23 outubru 2019 (TATOLI) – Diretór Komisaun Nasionál Aprovizionamentu (CNA-sigla portugués), Aniceto do Rosário, aprezenta Proposta Deliberasaun ba Konsellu Ministru (KM), kona-ba ajudikasaun kontratu ba edifísiu foun Tribunál Distritál Dili (TDD).

Kontratu ne’e sei finaliza prosesu aprovizionamentu ho imparsialidade, transparénsia no sei verifika empreza ne’ebé sai manan na’in no mós priense hotu rekezitu ne’ebé nesesáriu.

Notísia Relevante: TR Husu Adisionál Millaun $5-resin iha OJE 2020

Projetu ne’e rasik sei finansia husi Fundu Infraestrutura iha pakote Orsamentu Jerál Estadu (OJE) 2020.

Ministru Estadu Prezidénsia Konsellu Ministru, Hermenegildo Augusto Cabral Pereira, hateten aprezentasaun CNA hatudu konkluzaun aprovizionamentu nian, atu halo edifísiu foun.

“Prosesu ne’e mai ona ho Konsellu Administrasaun Fundu Infraestrutura (CAFI-sigla portugués) no fó ba CNA hodi halo aprovizionamentu ne’ebé demora tuir tempu normál, maibé konklui ona no aprezenta iha Konsellu Ministru hodi aprova adjudikasaun ba kompañia ne’ebé CNA rekomenda atu halo edifísiu foun ba TDD”, tenik governante ne’e iha Palásiu Governu, kuarta ne’e.

Nune’e nia dehan, KM konkorda ho proposta CNA ninian no sei avansa ba prosesu konstrusaun edifísiu foun TDD ninian.

Iha pakote OJE 2020, Tribunál Rekursu (TR) husu tan adisionál millaun $5-resin atu aloka ba konstrusaun Edifísiu TDD ho mós rezidénsia ba juíz sira iha Baucau ho Suai.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here