Konservasaun Internasionál instala sistema Hydropanel hodi prodús bee-moos hodi benefisia abitante aldeia Fatu’u no Akrema, Suku Bikeli, Postu Administrativu Atauru, Munisipiu Dili. Imajen/ Tatoli/Florencio Miranda Ximenes.

DILI, 23 outubru 2019 (TATOLI) – Konservasaun Internasionál (CI, sigla inglés) instala sistema hydropanel hodi prodús bee minerál hodi benefisia abitante sira iha aldeia Fatu’u no Akrema, Suku Bikeli, Postu Administrativu Ataúru, Munisípiu Dili.

Sistema hydropanel ne’e la uza eletrisidade ka bee ruma ba nia operasaun, maibé uza de’it atmosfera ka forsa loron matan, hamosu evaporasaun (penguapan) hodi prodús bee minerál ne’ebé ho kualidade di’ak no bele konsumu.

“Ami instala ona hydropanel hamutuk 80 to’o ona porsentu 90 iha Fatu’u no Akrema hodi prodús bee minerál no daudaun ne’e komunidade konsumu ona”, Diretora Ezekutiva CI iha Timor-Leste, Trudiann Dale, iha salaun Juventude, Suku Beloi, Ataúru, ohin.

Trudiann Dale dehan CI apoia sistema hydropanel ne’e, bainhira hala’o estudu deteta abitante iha aldeia rua ne’e laiha bee atu konsumu.

“Sistema ne’e ami instala ona unidade 40 iha Fatu’u no 40 iha Akrema atubele prodús bee minerál ba komunidade”, katak.

Programa CI nian la’ós foka de’it ba konservasaun no prezervasaun biodiversidade, maibé apoia mós instalasaun sistema hodi fó bee no eletrisidade ba abitante sira atu asegura atividade turizmu.

Nune’e, Diretora CI ne’e salienta sei fó treinamentu ba abitante iha área ne’ebá hodi bele hala’o manutensaun rasik bainhira hetan avaria. Enkuantu sistema ne’e bele dura tinan 10 to’o 15.

Rezidente Fatu’u, Belly C. Soares, sente satisfeita ho apoia CI ba sistema hydropanel tanba fasilita sira hodi hetan netik bee-moos hodi konsome. “Sistema ne’e instala ona unidade 40 no kada unidade prodús litru lima no ba unidade hotu kada loron prodús litru 200 ne’ebé iha tinan ne’e hahú konsumu ona”.

Bee ne’ebé prodús husi sistema ne’e fó bee minerál ba umakain 40 ba te’in no hemu. Enkuantu ba udan-been no bee-posu ne’e tanba masin, nune’e uza ba hariis.

“Bee ne’e de’it ladún sufisiente ne’ebé husu ba Governu atubele hala’o kanalizasaun atu ami labele depende de’it ba udan-bee no kuandu bailoron naruk ami la hetan bee-mós”, sujere.

Entretantu rezidente Akrema, Nadap Koreia, reforsa bee ne’ebé uza sistema hydropanel ne’e prodús hanesan água ba umakain 90.

“Ami hemu bee ne’e di’ak tebes tanba bee moos loos ne’ebé prodús husi sistema unidade 40 mak instala iha ami-nia aldeia. Ami husu nafatin Governu atu halo kanalizasaun bee ba ami atubele sustenta ami-nia moris loron-loron”, sujere.

Sistema instalasaun hydropanel ne’e, CI hetan apoiu finanseiru husi Banku Aziátiku Dezenvolvimentu (ADB, sigla inglés) no sei finaliza iha tinan ne’e.

Notísia relevante : CI-MAP Kria Área Marina Protejida 12 iha Illa Ataúru

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here