Beleza Natureza Illa Ataúru. Imajen/ Tatoli/Florencio Miranda Ximenes.

DILI, 22 outubru 2019 (TATOLI) – Lokaliza kilómetru (km) 25 norte husi Dili, kapitál nasaun nian, Ataúru mak illa ki’ik ida iha Timor-Leste ho nia beleza natureza ne’ebé poténsia ba ekoturizmu.

Iha fatin ne’ebé di’ak tebes atu nani, snorkeling ka luku-tasi. Ba ema hirak ne’ebé mak hakarak hetan ambiente naturál ida furak no interesadu iha ema Ataúru nia kultura no nia maneira moris nian, Ataúru fornese esperiénsia ida espesiál tebes buat ida auténtiku. Daudauk ne’e, turizmu sai setór emerjente ba ekonomia populasaun nian tanba riku-soin mariña ne’ebé Ataúru oferese ba turista.

Ho nia luan kuaze 117 km2, kumprimentu 25 km no largura 9 km, illa ne’e mak Postu Administrativu ida husi Munisípiu Dili ne’ebé fahe ba suku lima, Makili, Vila Maumeta, Beloi, Bikeli, no Makadade.

Suku Makili, Vila-Maumeta, Beloi no Bikeli mak lokaliza iha parte leste no Makadade mak iha parte foho nian. Foho Manukoko (metru 999) mak foho ne’ebé aas liu no konsidera nu’udár foho ida lulik.

Maizumenus iha populasaun na’in-10,000-resin, maioria nu’udár peskadór no agrikultór subsisténsia prinsipalmente. Ataúru hale’u ho ahu-ruin ne’ebé di’ak liu iha mundu entre ahu-ruin sira seluk no nu’udár fatin ida signifikante tebes ba ikan atu moris ba.

Iha tasi-leet rua ne’ebé kle’an tebetebes, Ombai no Wetar, hasoru malu iha parte norte no súl hosi Illa ne’e, Ataúru nu’udár destinu ekoturizmu foun ida furak tebes ho foho nakdalas, floresta no foho-lolon du’ut.

Illa Ataúru ne’e hale’u ho ahu-ruin ne’ebé riku ho kriatura tasi-laran nian no mós tasi ho kór azúl ne’ebé moos ne’ebé iha poténsia dezenvolvimentu ba turizmu iha rai-ketan ne’e inklui patrimóniu kulturál sira.

“Ami hakarak apoia Ataúru liuhosi programa Turizmu ba Ema Hotu atu sai ekoturizmu koñesidu iha Timor-Leste no mundu”, Jerente Projetu Turizmu ba Ema Hotu USAID iha Timor-Leste, Peter Simon, afirma iha semináriu daruak ba kria rede ho abitante Ataúru, iha Sede juventude Suku Villa Maumeta, ohin.

Programa Ajénsia Estadu Unidu ba Dezenvolvimentu Internasionál (USAID, iha inglés) ne’e aliña mós Planu Estratéjiku Dezenvolvimentu Nasionál (PEDN) 2011-2030.

Nune’e, Peter Simon friza USAID hahú hala’o estudu no prepara hela planu estratéjiku turizmu sustentavel.

USAID hahú koopera ho Governu Timor-Leste atu iha tinan 2030, sei sai área protejida no sai destinasaun ekoturizmu famozu iha mundu ne’ebé iha impaktu ki’ik husi dezenvolvimentu, iha enerjia renovavel, iha ahu-ruin saudavel no komunidade vibrante ida ne’ebé simu númeru limitadu husi bainaka sira ne’ebé respeitozu atu goza servisu exelente sira, esperiénsia kulturál no naturál autentika ne’ebé fornese husi povu Ataúru.

Nia adianta atu atinje mehi ne’e iha asuntu lima importante hanesan fó prioridade, prosperidade, protesaun, parseria no envolvimentu povu.

“Asuntu ka pilár lima ne’e mak la’o hamutuk atu apoia hodi dezenvolve turizmu iha Timor-Leste liuliu iha illa Ataúru”, katak.

Vise-Prezidente Asosiasaun Turizmu Koleku Mahanak Ataúru (ATKOMA), Mário Gomes, hatete hahú diskute ho Governu no parseiru internasionál sira no populasaun hodi kria estratéjia turizmu sustentável ba illa Ataúru tanba marka konkista ida ba indústria abranjente ida atu jere kreximentu turizmu iha 2030.

“Ita Ataúru oan mak tenke hamutuk dezenvolve no konserva no prezerva rikusoin illa Ataúru atu sai ekoturizmu ida koñesidu iha mundu no fó benefísiu ekonómiku ba povu”, sujere

ATKOMA daudaun servisu hamutuk ho Governu liuhosi Ministériu Turizmu, Komérsiu no Indústria no Sekretáriu Estadu Ambiente, inklui parseiru internasionál USAID no CI atu dezenvolve turizmu sustentável.

Administradór Postu Administrativu Ataúru, Munisípiu Dili, Mateus Belo, informa Ataúru ho nia lema “Ataúru maski rai ki’ik, maibé nia fuan boot” ne’ebé iha beleza naturál, tasi no foho nakonu ho rikusoin no paizajen ne’ebé furak.

Governu ho Organizasaun Naun Governamentál sira hahú organiza komunidade hodi loke vizaun turizmu ida ne’ebé loloos ba illa Ataúru no ninia povu.

Liuhusi prosesu konsulta, komunidade Ataúru deside hili ekoturizmu nu’udár modelu turizmu sustentavel ne’ebé garante protesaun kulturál no ambientál hodi benefisia komunidade Ataúru.

Hahú husi harii Asosiasaun Koleku Mahanak (2005), kontinua ba Grupu Turizmu Ataúru (2013) no iha 2016, nakfilak-aan ba Asosiasaun Turizmu Koleku Mahanak Ataúru (ATKOMA).

Ho apoiu husi USAID Tourism For All Project, ATKOMA hetan legalidade husi Ministériu Justisa iha 13 marsu 2019.

Ema hotu tenke envolve hodi dezenvolve ekoturizmu iha Ataúru tanba ekoturizmu bele dudu mós dezenvolvimentu iha setór produtivu sira seluk no bele hamoris investimentu no haburas ekonomia lokál no redús númeru dezempregu.

“Ita deklara ona Programa Ataúru MOS (Ataúru Matak, Organizadu no Saudavel), haburas hetan Ataúru ida ne’ebé Matak, harii sosiedade Ataúru ida ne’ebé forte no Organiza nune’e ita bele alkansa Ataúru Saudavel atubele atrai turista sira mai vizita no lori Ataúru ba Mundu no Lori Mundu mai Ataúru”, katak Mateus Belo.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here