Prezidente Parlamentu Nasionál, Arão Noé de Jesus da Costa Amaral. Imajen Tatoli/Cipriano Colo

DILI, 23 outubru 2019 (TATOLI)–Prezidente Parlamentu Nasionál (PN), Arão Noé de Jesus da Costa Amarál, hateten Prezidente Repúblika (PR) mak iha kompeténsia atu deside eleisaun antesipada (EA).

Arão Noé ko’alia asuntu ne’e bainhira hatán pergunta jornalista nian kona-ba deklarasaun Primeiru-Ministru (PM), Taur Matan Ruak katak bainhira laiha dalan ba membru Governu pendente bele hakat ba eleisaun antesipada.

Lee mós: Laiha Dalan ba Membru Governu Pendente, Bele ba Eleisaun Antesipada

Prezidente PN ne’e esplika, situasaun hotu bele akontese, tanba Timor-Leste hanesan nasaun demokrátiku, bainhira situasaun ladún di’ak, opsaun saida mak Prezidente Repúblika foti, importante tuir konstituisaun, laiha ema ida mak bele rekuza.

“Ha’u análiza Primeiru-Ministru nia intervensaun horisehik, liga ba bainhira laiha solusaun ba membru Governu pendente na’in sia, no se hakarak hili opsaun ba eleisaun antesipada, ha’u prontu. Ne’e katak Primeiru-Ministru prontu atu hakat ba EA kuandu laiha solusaun”, Arão haktuir.

Maski nune’e, Prezidente PN ne’e mós hateten, iha nasaun demokrátiku, órgaun ida-idak iha ninia kompeténsia rasik no situasaun hotu ninia desizaun depende ba órgaun ida-idak.

“Ha’u lakohi komentáriu, tanba Prezidente Repúblika mak iha kompeténsia atu deside eleisaun antesipada ka lae”, Arão afirma.

Nia mós fó hanoin katak públiku kestiona duni no husu atu koloka diálogu, maibé laiha ajenda diálogu.

Nia haklaken, antes ne’e iha Parlamentu Nasionál mós ezije diálogu, tanba ne’e, Prezidente Parlamentu hola inisiativa hodi halo ajenda ida hodi halibur bankada hotu no hahú diskute, maibé laiha rezultadu tanba ajenda diálogu laiha, hotu-hotu preokupa tanba lahatene diálogu ne’e atu ko’alia saida.

“Ita-nia problema iha ne’e. Problema loloos saida mak ita hakarak atu diskute iha diálogu ne’e, tanba ita tenke tau asuntu ida iha diálogu ne’e mak bele diskute”, Arão subliña.

Tanba ne’e, Prezidente PN husu ba intelektuál sira ne’ebé koloka beibeik diálogu, nia husu tau tópiku nune’e bele hatene kona-ba kontextu hosi diálogu.

Kona-ba formasaun Governu, Arão esplika, ne’e laiha problema tanba Governu konstituidu tuir artigu 106 Konstituisaun Repúblika Demokrátika Timor-Leste, katak, mai husi partidu ne’ebé manán maioria, ka Aliansa Maioria Parlamentár.

Tanba ne’e, nia dehan, Governu formadu no la’o hela, iha mós Maioria Parlamentár atu aprova programa Governu nian no orsamentu jerál Estadu la’o nafatin.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here