Mapa Ataúru. Foto/Google.

DILI, 22 Outubru 2019 (TATOLI) – Administradór Postu Administrativu Ataúru, Munisípiu Dili, Mateus Belo, hatete abitante iha suku Makili no Makadade seidauk asesu ba estrada.

“Kondisaun Estrada ba Makili no Makadade ne’e grave tebes hodi difikulta komunidade sira asesu bá merkadu”, Administradór Mateus Belo afirma iha salaun Juventude, suku Villa Maumeta, ohin.

Tanba ne’e Governu sentrál presiza fó atensaun séria tanba hato’o ona proposta ba, maibé seidauk iha resposta.

Aléinde ne’e administradór dehan abitante suku Makili mós 100% seidauk asesu eletrisidade.

Rezidente Suku Makili, Faustino Gomes, husu ba Governu atu hadi’a estrada ne’e hodi fasilita sira halo movimentu liuliu asesu bá merkadu.

“Estrada ne’e grave tebes, ami susar loos kuandu tempu udan. Ami eletrisidade mós seidauk tama ne’ebé difikulta tebes ami no ami-nia oan sira atu estuda”, dehan nia ho triste.

Iha parte seluk kona-ba suku Beloi, Bikeli no Villa Maumeta, Mateus Belo salienta kondisaun estrada di’ak uitoan ona, maibé seidauk uza alkatraun, más bele fasilita ona  sira.

“Ami-nia postu ne’e sei difisil liu mak bee-moos ne’ebé ministériu kompetente tenke fó atensaun séria”, katak.

Nia adianta, illa Ataúru potensiál ba turizmu, maibé lá asesu bee-moos ne’e difisil atu vizitante sira vizita.

Totál abitante suku Makadade tuir sensu 2015, hamutuk 1.632 ho área 35,35 km no abitante suku Makili na’in-2.062 ho área 14,65 km no totál populasaun illa Ataúru iha rihun 10-resin.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here