Prizoneiru sira iha Prizaun Becora transfere ba Prizaun Suai, segunda (2/09/2019). Imajen/Antonio Goncalves

DILI, 22 outubru 2019 (TATOLI) – Diretór Estabelesimentu Prizaun Becora, João Domingos, ohin, hato’o pedidu ba Tribunal Distritál Dili (TDD) atu liberta kondisionál  aprezu Miguel Soares, tanba kumpre ona metade  pena iha 2017.

Deklarasaun ne’e hato’o hosi Diretór Estabelesimentu Prizaun Becora, João Domingos, ba jornalista sira iha TDD, hafoin aprezenta deklarasaun komportamentu arguido Miguel nian iha TDD.

“Ami mai iha Tribunal kona-ba pedidu ne’ebé ami hato’o ba tribunal husu atu fó liberdade kondisionál ba arguido Miguel, tanba nia kumpre ona metade  pena iha tinan 2017,” informa João Domingos ba jornalista sira iha TDD.

Razaun parte prizaun hato’o rekomendasaun tanba haree ba komportamentu arguido nia prienxe hotu rekizitu, katak arguido hatudu hahalok di’ak no merese hetan liberdade.

Prezu ne’e tribunal kondena prizaun tinan sia (9) iha tinan 2012 tanba viola krime kontra umanidade (Omisídiu grave) iha tinan 1999 nian, no akontese iha Postu Administrativu Bazartete, Munisípiu Liquiça.

Parte tribunal liuhosi julgamentu husu direita ba arguido nia komportamentu durante iha prizaun, no husu arguido nia arrependimentu.

Prezu ne’e mós, hatán ba tribunal katak nia arrepende duni ba sala sira ne’ebé halo durante ne’e, tanba ne’e husu perdaun ba tribunal.

Hare ba ida ne’e Tribunal husu parte prizaun atu hein de’it no sei fó rezultadu iha tempu besik.

“Pedidu ne’e tribunal simu, no tribunal sei halo analiza ba prosesu hotu depois konfirma iha tempu besik,” hatete juiz prezide Antonio Fonseca.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here