Vise Prezidente Parlamentu Nasionál, Maria Angelina Sarmento. Imajen/Egas Cristóvão

DILI, 22 outubru 2019 (TATOLI)-Vise Prezidente Parlamentu Nasionál, Maria Angelina Sarmento, ohin, informa, iha debate orsamentu jerál estadu 2020, husu ba governu atu aloka orsamentu ida adekuadu ba protesaun diretu ema ho defisiénsia.

Notísia Relevante: PN Aprova Rezolusaun Medida Protesaun ba Ema ho Defisiénsia ho Unanimidade

“Ami hanoin iha periodu debate orsamentu jerál estadu ida ne’e, espera katak parlamentu sei asegura hodi husu ba governu  tau prioridade ba ema ho defisiénsia  ho orsamentu ida ne’ebé adekuadu ba ema ho defisiénsia,” hateten Maria Angelina Sarmento, durante semináriu internasionál ema ho defisiénsia ne’ebé organiza hosi Provedoria Direitu Umanu no Justisa (PDHJ-sigla portugés) iha Timor Plaza.

Maske daudaun ne’e governu no parlamentu kria ona lejizlasaun no polítika ba ema ho defisiénsia, maibé  laiha rekursu orsamentu adekuadu kada tinan maka  sei laiha ninia signifikasaun direta ba ema ho defisiénsia.

Orsamentu ne’ebé sufisiente, tuir Deputada Maria Angelina Sarmento, sei tulun governu atu implementa rekomendasaun Parlamentu ne’ebé aprova iha  rezolusaun 38/2019, loron 01 fulan outubru, hodi rekomenda ba Governu atu fó prioridade no protesaun   ba diretu ema ho defisiénsia.

Pontu sanulu resin maka PN prodús iha rezolusaun ne’e maka ezije Governu atu halais prosedimentu legál  ba ratifikasaun konvensaun internasionál ba diretu  ema ho defisiénsia.

Dezenvolve departamentu  Governu nian kompetente sira, kria polítika ida transversal, integrada ho perspetiva jéneru no promove inkluzaun ema ho defisiénsia iha vida públika.

Adopta medida hanesan asaun ba sensibilizasaun hamutuk iha família no mós komunidade atu prevene inkluzaun ba labarik no joven sira ho defisiénsia iha eskola, no formasaun profisionál. Adopta medida nesesária ba implementasaun estratéjia nasionál ba saúde mentál ne’ebé aprova husi Ministériu saúde. Kria kondisaun ba prestasaun  kuidadu saúde mentál.

Asegura formasaun adekuada ba ofisiais justisa, defensór, Prokuradór, juizés no advogadu kona-ba diretu ema ho defisiénsia. Asegura formasaun adekuada ba profisionál saúde sira atu hadi’a atendimentu ba defisiénsia sira.

Nune’e mós asegura formasaun adekuada ba profesór sira  no ajente sira iha setór edukativu kona-ba diretu ema ho defisiénsia no modelu ensinu di’ak liu no adekuadu ba labarik sira.

Adopta ekipamentu no materiál sira ne’ebé posivel atu responde ba labarik sira ho defisiénsia iha eskola sira no a promove ema ho defisiénsia iha kampu serbisu.

Promove posibilidade uza linguajen jestuál iha Televizaun ba transmisaun informasaun sira no mós promove medida posivel iha sinais tránzitu atu sirkula ho forma ida autónoma no seguru.

Alende ne’e, kria kondisaun legais no fízika atu bele garante edifísiu  no ekipamentu públiku atu hetan asesu hosi ema defisiénsia sira.

Jornalista : Agapito dos Santos

Editór        : Francisco Simões

HAKEREK NO HATÁN

Please enter your comment!
Please enter your name here