Mate isin eis Ministru Defeza, Cirilio Cristovão to'o iha Aeroportu Prezidente Nicolau Lobato, simu hosi família no amigo sira, tersa (22/10/2019). Imajen/Eugénio Pereira

DILI, 22 Outubru 2019 (TATOLI)-Serimónia funerál matebian eis Ministru Defeza, Cirilio José Jacob Valadares Cristovão, sei hala’o tuir rituál uma lisan “Cuno Ratu”, Aldeia Titilari, Suku Fuiluro Postu Administrativu Lospalos, Munisipiu Lautem, sábadu (25/10/2019).

Notísia Relevante : Eis Ministru Cirilio Fó Kontribuisaun Makas ba Setór Defeza ho SNI

Reprezentante Uma Lisan “Cuno Ratu”, Horacio dos Santos hateten, bainhira mate isin lori ba rai iha matebian nia uma Titilari sei hadeer too loron haat tuir kultura Uma Lisan “Cuno Ratu” hodi hein família (fetosaa-umane) sira inklui lia na’in hamutuk hodi hasai naan karau ulun ho tudik ba uma mane para hetan matak malirin hotu foin hala’o serimónia funerál ho parade militár  hosi Komandu FALINTIL-Forsa Defeza Timor-Leste (F-FDTL).

Matebian Cirilio nu’udar oan mane boot hosi Tomás José Cristovão (matebian) ho Maria Madalena (matebian)  hosi maun-alin nain tolu (3).

Reprezentante família hato’o agradese ba Governu Timor-Leste liuhosi Ministériu Saúde, Ministériu Negósiu Estranjeiru no Kooperasaun (MNEK) ho lider karizmátiku  Kay Rala Xanana Gusmão ne’ebé ho domin boot sempre akompaña no vizita matebian durante sofre moras kuaze tinan ida liu iha Ospitál Bros, Denpasar, Indonézia.

Durante hala’o tratamentu iha Ospitál Bros, Denpasar, Indonézia, matebian sofre moras korasaun no kankru serebrál (kanker otak) hodi halo matebian fila hikas ba Aman Maromak Nia Kadunan Santu iha loron domingu iha Ospitál Bros, Denpasar, Indonézia, tuku 19:45 oras Bali.

Matebian eis Diretór SNI ne’e mate husik hela  feen kaben, Brigida Antonia Correia ho oan na’in haat (4) feto rua, mane  rua; Nidia Euxilia Cindymor Cristovão, Donio Milton Cindymor Correia Cristovão, Nadilla Tomas Cidymor Correia Cristovão no Zejualdo José Cindymor Correia Cristovão.

Eis Ministru Defeza Sestu Governu Konstitusionál ne’e nu’udar primeiru diretór SNI ne’ebé fó mós kontribuisaun iha setór seguransa nian liu-liu organiza SNI hala’o servisu koordena ho Komandu F-FDTL no PNTL hodi garante estabilidade seguransa iha Timor-Leste.

Tuir observasaun Ajénsia Tatoli, nota hahú ohin, Espoza Presidente Repúblika,  Cidália Lopes Nobre Guterres ho ekipa hala’o mós vizita ba mate uma hodi presta omenajen. Alende ne’e, iha mós vizita kondolénsia hosi Ministru Defeza no Seguransa, Filomeno da Paixão de Jesus, Ministru Negósiu Estranjeiru no Kooperasaun (MNEK), Dionísio Babo Soares no membru governu, deputadu, amigu no família sira.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here