Responsável Programa Imunizasaun Moras Sarampu, Maria Angelina Pereira. Foto TATOLI: Felicidade Ximenes

DILI,22 outubru 2019 (TATOLI)-Sentru Saúde Comoro (SSC) liuhusi programa imunizasaun sentru nian sensibiliza no partilla informasaun ba autoridade lokál sira hanesan Administradór Postu Administrativu no xefe suku sira iha Dom Aleixo, Comoro, atu sira mós iha koñesimentu bainhira programa saúde, atu vasina sarampu ba labarik sira ne’ebé foin moris, to´o tinan lima.

Responsável Programa Imunizasaun Moras Sarampu, Maria Angelina Pereira hateten,  tanba kazu surtu ka sarampu ne´ebé mosu iha Dom Aleixo mak Organizasaun Mundiál Saúde (OMS) hamutuk ho Ministériu Saúde (MS) kria programa imunizasaun ne´e ba labarik hotu iha Timor-Leste para iha obrigasaun tenke hetan vasinasaun molok tinan lima vasina kompletu.

“Labarik sira ne’ebé hetan kazu sarampu iha Dom Aleixo ne’e iha ema na´in 10 mak pozitivu no iha suspeitu de´it mak hamutuk 102,” divulga Responsável Maria Angelina Pereira bainhira ramata sensibiliza informasaun ba autoridade lokál no komunudade iha SSC, ohin.

Nia haktuir, labarik na´in 10 ne’ebé positivu ne’e sira pesoál saúde sira vizita husi uma ba uma  no hetan sinál ne’ebé mak hetan isin manas, inus-been, matan mean ho isin lolon ne’ebé kafuak-kafuak, entaun sira haruka ba iha SSC hodi hasai raan, depois labarik sira-nia raan ne´e lori ba laboratóriu nasionál depois rezultadu simu husi laboratóriuu nasionál haruka fila fali ba sira, iha SSC.

“Ami tun ba iha labarik sira ne’ebé mak hetan moras sarampu, ami ba halo observasaun no hare labarik nia kondisaun oinsá depois ami mós halo prevensaun vasinasaun ba ema ne’ebé mak hela iha ne’ebá, ezemplu ema na´in tolu iha aldeia ida ne’ebé mak hetan moras sarampu tenke vasina hotu, iha fulan sia to´o tinan 40. Signifika vasinasaun sarampu ne’e la haree ba idade, hotuhotu tenki hetan vasina sarampu,” priza pesoál saúde SSC ne´e.

Labarik sira iha Dom Aleixo ne´ebé seidauk hetan vasinasaun kompleta, tuir  Responsável Maria Angelina Pereira katak bazea ba lista Programa Imunizasaun, SSC, nian justifika katak barak tebes tanba haree ba rezultadu ne’ebé sira tama sai uma, labarik barak ho inan barak mak seidauk vasina entaun tenke tuir vasinasaun sarampu.

Iha Dom Aleixo, iha aldeia 71, entaun esforsu maka’as husi programa imunizasaun no apoiu maka´as husi xefe sentru saúde no koloka ona profisionál saúde ne’ebé mak servisu iha SSC fahe ba aldeia sira.

“Signifika, iha aldeia iha pesoál saúde ida mak toma konta. Entaun mosu kazu sarampu ida, pesoál saúde ne’e mak tenke responsabilidade tanba nia mak tenke hatene área ne’e rasik; númeru inan isin-rua, númeru labarik ne’ebé vasina la kompletu, ne’e pesoál saúde tenki hatene no nia tenke responsabilidade,” friza Responsável Programa Imunizasaun Moras Sarampu, SSC ne´e.

Iha biban hanesan, Responsável Maria Angela Pereira ne´e informa mós katak problema boot ne´ebé pesál saúde sira enfrenta bainhira halo imunizasaun ba labarik sira mak transporte. Maske nune´e, tuir nia katak programa ne’ebé SSC hala´o Ministériu Saúde mós tau atensaun.

Kona-ba ai-moruk, Responsável Programa Imunizasaun Moras Sarampu, SSC ne´e konfirma: “Aimoruk vasinasaun iha Sentru Saúde Comoro sufisiente no prepardu ona husi SAMES no servisu Munisipál Dili no sentru saúde. Se menus ka la sufisiente ami sei halo pedidu rekizisaun ba iha servisu Munisípiu Dili depois sira ba foti iha SAMES mak foin lori fali mai ami iha Sentru Saúde Comoro”.

Partispa iha sensibilizasaun kona-ba moras sarampu ne´e  mak reprezentante Postu Administarativu Dom Aleixo, lider komunitáriu sira iha Dom Aleixo, komunidade inklui pesoál saúde iha SSC ne´e rasik.

Notísia relevante:Labarik Fulan Sia Tenke Hetan Vasinasaun Sarampu Rubela

Jornalista :Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here