Logo Sekretaria Estadu Juventude no Desportu (SEJD)

DILI, 22 outubru 2019 (TATOLI)–Diretór Nasionál Desportu Sekretaria Estadu Juventude no Desportu (SEJD), João Rodrigues hateten Governu halo ona preparasaun hodi realiza jogu kontinuasaun fronteira ne’ebé sei hala’o hosi 14-21 novembru mai ne’e iha Munisípiu Bobonaro.

“Agora parte komisaun organizadora ba jogu ne’e halo hela koordensaun hodi prepara jogu ne’e no halo identifikasaun ba fatin kompetisaun. Fatin ita sei hala’o duni iha Munisípiu Bobonaro,” dehan João ba Agência Tatoli, tersa ne’e, iha edifísiu SEJD, Lecidere.

Nia esplika jogu ne’e hala’o atu hametin relasaun di’ak entre munisípiu ne’ebé besik fronteira hanesan Bobonaro, Covalima no Rejiaun Administrativa Espesiál Oé-Cusse Ambeno (RAEOA). Enkuantu, hosi Indonézia nian mak hanesan Atambua, Malaka no Kefa.

“Iha fulan jullu liubá ami ba hasoru ona ho Governadór Nusa Tenggara Timur (NTT) ko’alia loos hotu ona. Loloos, ita hala’o iha 28 outubru maibé iha parte balun seidauk iha preparasaun entaun adia tiha fali,” nia haklaken.

Totál orsamentu ba eventu ne’e hamutuk rihun $122 hosi orsamentu jerál Estadu (OJE) 2019.

“Loloos ne’e, orsamentu iha de’it rihun $80, maibé haree ba fasilidade hanesan jináziu ita presiza hadi’a tan entaun tenke hasa’e orsamentu,” nia subliña.

Jogu refere modalidade tolu mak sei partisipa hanesan voliból feto-mane, basketból feto-mane no futeból ba mane.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here