Primeiru-Ministru, Taur Matan Ruak. Imajen Tatoli/Cipriano Colo

DILI, 22 outubru 2019 (TATOLI)–Primeiru-Ministru (PM), Taur Matan Ruak, sei orienta Ministra Edukasaun Juventude no Desportu (MEJD), Dulce de Jesus Soares atu buka meiu oinsá bele rezolve eskola sira iha Lospalos, Munisípiu Lautém, ne’ebé lahó kondisaun.

“Ha’u sei transmite ba parte Ministériu Edukasaun Juventude no Desportu atu buka meiu oinsá bele rezolve no sei ko’alia hamutuk atu halo planu saida mak bele halo iha tinan ne’e. Se lae bele enkaixa ba orsamentu jerál Estadu tinan oin”, Taur hateten lia hirak ne’e hafoin enkontru semanál ho Prezidente Repúblika, Francisco Guterres Lú Olo iha Palásiu Prezidente Nicolau Lobato, Bairru Pité, ohin.

Lee mós: Prezidente Repúblika Preokupa Kondisaun Edifísiu EBC Leusari

Primeiru-Ministru hateten, durante enkontru, Xefe Estadu husu Governu atu fó atensaun ba preokupasaun ne’ebé komunidade hato’o bainhira Xefe Estadu hala’o vizita ba Munisípiu Lautém, liuliu eskola sira ne’ebé iha tempu udan prosesu aprendizajen paradu.

“Haree ba eskola sira ne’ebé presiza atensaun emerjénsia, Prezidente Repúblika husu atu Primeiru-Ministru foti medida hodi hadi’ak eskola sira ne’ebé lahó kondisaun, laiha kakuluk, janela no odamatan atu prosesu aprendizajen kontinua la’o maski tempu udan,” nia informa.

Nia dehan tan, Prezidente Repúblika hato’o mós kona-ba atividade ekonómika produtiva hosi inisiativa komunidade hodi harii fábrika mina nuu no sabaun iha Munisípiu Lautém ne’ebé presiza hetan apoiu hosi Governu atu bele dezenvolve-aan di’ak liután.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here