Diretora Ezekutiva CI, Trudiann Dale, esplika meiu prezervasaun bioversidade iha Illa Ataúru. Imajen/Florencio Miranda Ximenes.

ATAÚRU, 22 Outubru 2019 (TATOLI) – Diretora Ezekutiva ba Konservasaun Internasionál iha Timor-Leste (CI, sigla inglés), Trudiann Dale, husu ba populasaun sira iha Timor-Leste no rai-ketan Ataúru, atu dezenvolve no konserva natureza liuliu ba área tasi protejida 12 sei hetan benefísiu finanseiru hosi sira-nia konservasaun.

“Meti ahu-ruin sira iha rai-ketan Ataúru iha valór boot ba povu Timor-Leste no mós ba planeta tomak. Atu mantein sira-nia saúde, proteje sira hasoru kamutis, sustenta populasaun ikan barak, no hapara poluisaun, hela vitál ba rai-ketan nia futuru no ema ne’ebé hela iha ne’ebá”, Trudiann Dale afirma iha salaun Juventude, Suku Villa Maumeta, Ataúru, ohin.

Trudiann Dale dehan esforsu konservasaun hirak-ne’e reflete rejiaun nia aspirasaun ba dezenvolvimentu bazeia ba natureza, ho nia baze iha turizmu, ho Ataúru iha pozisaun únika ba susesu.

Tuir peskiza CI, Timor-Leste iha tasi buras ho biodiversidade aas liu hotu iha mundu, inklui datoluk-ida hosi mundu nia populasaun baleia no golfiñu.

“Inisiativa ekoturizmu iha rede área protejida foun nia laran oferese oportunidade la ho presedente ba komunidade sira-ne’ebé proteje no depende ba ekosistema meti atu ahu-ruin sira atubele hatán benefísiu hosi sira-nia konservasaun”, katak.

Konservasaun Internasionál servisu iha Timor-Leste durante dékada ida ona no lidera peskiza signifikante liu hotu kona-ba rejiaun nia biodiversidade, inklui avaliasaun iha 2016 ne’ebé hetan katak Ataúru nia ekosistema ahu-ruin sira iha númeru médiu aas liu hotu hosi espésie ikan ahu-ruin nian ba kada fatin iha mundu tomak.  Estudu ida-seluk rejista tiha baleia no golfiñu liu 2.280 inklui superpod (golfiñu) sira ho indivíduu to’o iha 600 hosi espésie 11.

Foin lalais liu, nia dehan Konservasaun Internasionál mak matadalan kolaborasaun entre grupu konservasaun komunitária no operadór negósiu luku-tasi sira.

“Konservasaun Internasionál mós dezenvolve matadalan sira ba Governu nasionál atu konsidera bainhira nia dezenvolve enkuadramentu regulatóriu ba turizmu responsavel sentralizadu ba atividade observasaun baleia no golfiñu”, sujere.

Trudiann Dale salienta katak unifikasaun no akordu ho kompañia luku-tasi sira mak manán no hakat boot ida ba nasaun nia esforsu atu harii nia ekonomia hosi turizmu sustentavel bainhira mós proteje área ida ho biodiversidade tasi-laran.

Konservasaun Internasionál servisu iha Timor-Leste hosi tinan 2009, estabelese nia eskritóriu iha 2012 servisu hela diretamente ho Governu liuhusi Ministériu Agrikultura no Peska, Ministériu Komérsiu, Indústria no Ambiente, no Sekretária Estadu ba Ambiente no komunidade lokál sira atu hapara krize klimátika no hadi’ak seguransa ai-han no buka-moris ba povu Timor-Leste, prinsipalmente liuhosi estabelesimentu no jestaun sustentavel ba área protejida krítika iha rai-maran no tasi-laran.

Konservasaun Internasionál uza siénsia, polítika no parseria sira atu proteje natureza ne’ebé ema depende ba sira-nia hahán, bee-moos no ekonomia. Harii uluk iha 1987, Konservasaun Internasionál servisu ona iha país liu 30 iha kontinente neen hodi asegura planeta saudavel no prósperu ne’ebé bele suporta nia emar hotu.

Notísia relevante : CI-MAP Kria Área Marina Protejida 12 iha Illa Ataúru

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here