Prezidente Federasaun Halterofilizmu Kultura Fizika Pezu Timor-Leste (FHCFPTL-sigla Portugés), Vicente Carvalho. Imajen Tatoli/Hortençio Sanchez

DILI, 22 outubru 2019 (TATOLI)–Prezidente Federasaun Halterofilizmu Kultura Fizika Pezu Timor-Leste (FHCFPTL-sigla Portugés), Vicente Carvalho, hateten atleta na’in tolu hosi federasaun refere sei reprezenta Timor-Leste (TL) iha jogu internasionál Sea Games ne’ebé sei hala’o iha Manila-Filipina, novembru 2019.

“Kona-ba preparasaun la’o di’ak tebes. Maski la hanesan nasaun seluk sira maibé ami prepara durante tempu naruk nia laran, tan ne’e prontu duni atu ba kompete iha eventu ne’e. Ne’e mak ita-nian iha atleta na’in tolu mak sei partisipa,” tenik Vicente ba Agência Tatoli, tersa ne’e, iha Jináziu Dili.

Atleta tolu ne’e kompostu hosi mane ida no feto rua mak hanesan José Garcia sei kompete iha kilógrama 73, Maria Imaculada Lemos sei kompete iha kilógrama 71 no Maria Imaculada Ximenes sei kompete iha kilógrama 55.

“Atleta sira ne’e, ita bele dehan preparadu loos ona. Ita hein de’it bainhira mak aranka,” nia dehan.

Tuir nia katak maski nasaun barak mak sei kompete iha eventu ne’e maibé ho preparasaun ne’ebé atleta hirak ne’e halo bele lori rezultadu sufisiente mai Timor-Leste.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here