Sesaun plenária iha Parlamentu Nasionál. Imajen dok. Tatoli

DILI, 22 outubru 2019 (TATOLI) – Tuir ajenda, aban (23/10) Komisaun Espesializada sira iha Parlamentu Nasionál (PN) hahú halo audiénsia ho Governu kona-ba Proposta Orsamentu Jerál Estadu (OJE) 2020.

“Ajenda ohin baixa ho ninia previsaun termina iha loron dezembru, tanba ne’e aban tempu komisaun sira hahú sira-nia planu audiénsia no análiza kona-ba Proposta Lei Orsamentál ninian. Audiénsia to’o loron 14 novembru, sira sei haree relatóriu pareser, no loron 15 novembru Komisaun sira submete ona relatóriu pareser ba sektoriál Komisaun C”, tenik Prezidente Parlamentu Nasionál (PPN), Arão Noé de Jesus da Costa Amaral, iha resintu PN, tersa ne’e.

Notísia Relevante: Governu Submete Ona Proposta Lei OJE 2020 ba PN

Nune’e, Komisaun C ne’ebé trata asuntu Finansa Públika, hahú loron 15 to’o 18 novembru prepara relatóriu pareser konjunta husi komisaun sira seluk hodi aprezenta iha plenária.

PPN entrega ona Proposta OJE 2020 ba Prezidente Komisaun Espesializada sira, hahú hosi Komisaun A to’o Komisaun G.

Notísia Relevante: Konsellu Ministru Aprova Proposta OJE 2020 Biliaun$1,950

Iha loron 21, 22 no 25 novembru sei hala’o diskusaun no votasaun iha faze espesialidade, enkuantu votasaun finál globál sei akontese iha loron 10 dezembru, hafoin Komisaun C prepara testu finál.

PN sei aprezenta testu finál Proposta OJE 2020 Prezidente Repúblika, Francisco Guterres ‘Lú Olo’ iha loron 11 dezembru.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here