Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen/Egas Cristovão.

DILI, 21 outubru 2019 – Iha Proposta Orsamentu Jerál Estadu (OJE) 2020 ho totál biliaun $1,950, Governu kontinua foti liu Rendimentu Sustentável Estimadu (RSE) ne’ebé ho kalkulasaun millaun $536,8, nune’e foti liu RSE hamutuk millaun $929,9, enkuantu husi Fundu Petrolíferu hamutuk biliaun $1,466.

Ba asuntu ne’e, Ministru Reforma Lejislzlativa no Asuntu Parlamentár, Fidelis Manuel Leite Magalhães, hateten VIII Governu Konstitusionál prevee OJE 2020 ho montante boot tanba nesesidade barak.

“Problema maka ita-nia Rendimentu Sustentável Estimadu hatuur iha pursentu tolu de’it, enkuantu ita-nia nesesidade barak tebes atu responde ba preukupasaun. Entaun ita tenke foti aas liu RSE”, tenik Ministru Fidelis iha plenária, segunda ne’e.

Notísia Relevante: Konsellu Ministru Aprova Proposta OJE 2020 Biliaun$1,950

Governante ne’e dehan, maski ema-nia hanoin Governu prevee osan barak iha tinan oin, maibé loloos maka ita laiha osan barak atu responde nesesidade ne’ebé sempre barak liu kapasidade finanseira.

“Ho ida ne’e maka Proposta Orsamentu 2020 besik biliaun rua. Ita manán ona Fronteira Marítima no agora ita-nia plataforma sira funsiona hela, entaun ita presiza investe nune’e ró sira bele patrulla”, nia akresenta.

Nia subliña, iha diskusaun OJE 2020 maka Governu sei halo esplikasaun kle’an ba osan biliaun $1,950.

Antes ne’e, Bankada Opozisaun FRETILIN preokupa maka’as ho montante OJE 2020 ne’ebé boot tebes.

“Durante tinan 10 resin nia laran, dezde Aliansa Mudansa ba Progresu (AMP) hahú ninia governasaun, Orsamentu Jerál Estadu kada tinan boot ba beibeik”, tenik Vise-Xefe Bankada FRETILIN, Francisco Miranda Branco, liuhosi Konferénsia Imprensa, segunda ne’e.

Deputadu ne’e subliña, nu’udar membru Parlamentu, iha kompeténsia atu halo fiskalizasaun ba ezekusaun OJE, nune’e bele garanti katak osan ne’ebé aprova iha Parlamentu Nasionál (PN), ezekuta duni tuir verba ne’ebé tama iha lei OJE.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Bele foti barak liu husi RSE maibe tenki iha justifikasaun klaru, atu nunee bele hatene katak osan gastus ba saida saida, ita nia necessidade tinan nee ba oin barak duni maibe mak nee ita tenki iha jerente nbee diak honestidade atu nunee buat hotu bele lao tuir nia planu no programa sira. Aderito de Jesus.Estudante

HAKEREK NO HATÁN

Please enter your comment!
Please enter your name here