Peskadór sira bainhira dada bero mai tasi-ninin. Imajen Jogerjo Guterres

OEKUSI, 21 outubru 2019 (TATOLI) – Peskadór sira husi bairru Oe-nis, aldeia Oenunu, suku Suniufe, sub rejiaun Nitibe, husu ba autoridade Rejiaun Administrativa Espesiál Oekusi Ambenu (RAEOA) atu kria hela merkadu ikan.

Peskadór Matias Seno. Imajen Jogerjo Guterres

Peskadór Matias Seno (43) ba Tatoli bainhira halo hela atividade peska, sesta kotuk hateten sira nian rezultadu peska, hetan ikan oinoin, maibé fatin propriu (merkadu)  mak laiha.

Nia konta bainhira hetan ikan, nia rasik lori ba fa’an iha Oekusi Vila ho maneira tama sai bairru, no dalaruma ema balun maihusi Ataúru no Dili mak tetu, más ho folin ne’ebé ki’ik tebes, kada kilograma $2.75.

“Ha’u presiza liu maka autoridade tenke prepara fatin própriu ba ami atu bele fa’an ami nia ikan, tanba durante ne’e ha’u fa’an de’it tama uma sai uma, husi ne’e ba to’o Oekusi Vila, kuaze kilometru 20”, afirma.

Husi rezultadu peska ne’ebé iha, ema ida bele hetan $50 kada loron, maibé kuandu tasi di’ak, bele hetan to’o $100 kada loron.

Osan sira ne’e, Matias uza hodi selu oan sira nia eskola, uza mós hodi sustenta moris, inklui kompleta meiu hodi halo peska hanesan mákina, rede no kail isin.

Bairru ne’e iha família hamutuk 21 ne’ebé servisu prinsipál maka peska,  feto no mane hotu-hotu tama tasi.

Meius ne’ebé sira uza ba peska, balun uza mákina, balun uza de’it manuál, ida ne’e difikulta sira ba  iha tempu udan, laloran boot,  úniku sira ne’ebé uza mákina mak bele tama tasi, katak tan. “Ami presiza bero, rede, mákina no kail isin”.

Aman oan nain haat, nain tolu eskola iha eskola ensinu primeiru no segundu sikulu iha Oenunu, realsa oras ne’e halo kréditu osan iha mikrokreditu hodi hola mákina atu uza ba peska, maibé seidauk re-imbolsa hikas osan ne’ebé nia foti.

Peskadora, Asaozinha Bubara. Imajen Jogerjo Guterres

Nune’e mós Asaozinha Bubara, peskadora ne’ebé lorloron moris iha tasi hatutan, hanesan inan ida ne’ebé moris iha tasi, lorloron tama tasi ho nia kaben hodi hatun rede, hakail, tanba moris iha tasi ibun la toman halo toos.

Asaozinha mos hatene nani, luku, hatuun rede, hakail, no he’an ró. “Lorloron hamutuk ho ha’u nia kaben, oan sira buka moris iha tasi laran”, haktuir.

Preokupasaun hanesan ne’ebé nia hato’o mak merkadu, tanba distánsia lori ba Oekusi Vila kuaze kilometru 20.

“Durante ne’e maluk siira husi Dili no Ataúru mai tetu iha ne’e, maibé ho folin ki’ik,  ida ne’e ita lakon boot”, akresenta.

Nia mos enfrenta difikuldade tanba laiha motor, baibain uza de’it mak bero ki’ik no bainhira tempu udan, laloran boot nia labele tama tasi.

Peskadora, Acorta Ximenes. Imajen Jogerjo Guterres

Peskadora Acorta Maria Ximenes Gama (38) haktuir, hanesan agrikultora, tuir loloos moris ho servisu toos, maibé iha bairru ne’e hot-hotu tama tasi, tanba feto mos bele hatun rede, hakail, nani, no luku.

“Lorloron, ha’u ho ha’u nia kaben, oan, tama hotu ba tasi hodi hatun rede, tanba ha’u tenke ajuda ha’u nia kaben buka osan”, hateten Acorta.

Distánsia husi bairru Oe-nis to’o fatin peska nian ho naran Panaf Uthau, kilometru tolu, maibé peskadora ne’e lorloron, iha dader tuku neen, hatuun rede, no bainhira anin boot hakail de’it.

Durante ne’e, hetan espesie ikan oioin, dala barak hetan ikan boot no fa’an ba ema sente lakon tanba ho folin ki’ik, maibé tenke fa’an tanba kondisaun mak hanesan ne’e, no laiha merkadu própriu.

“Durante ne’e ami fa’an ami sente lakon, tanba ema mai tetu ho folin $2 de’it kada kilograma, maski hetan ikan boot, maibé pasiensia tenke fa’an de’it ona tanba kondisaun mak hanesan ne’e ona”, afirma tan.

Acorta husu ba autoridade atu kria kondisaun, liuliu merkadu ikan nian tanba lorloron sira sempre hetan ikan maibé fa’an la folin.

Nia husu mos apoiu bero, rede ki’ik, boot, mákina, kail isin no seluk tan. Acorta oras ne’e halo hela kréditu iha mikrokreditu hodi sosa mákina, maibé selu seidauk hotu.

Nia dehan, baibain iha tempu udan laloran boot maibé nia sempre tama tasi tanba iha tempu udan  sempre hetan ikan  boot. “Loron ida hetan osan uitoan liu mak $50, maibé dala ruma hetan to’o $200”, nia konta. Acorta  iha oan nain  neen, nain rua moris iha tasi ibun no nain haat seluk moris iha uma.

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here