Ministru Transporte no Komunikasaun, José Agostinho da Silva. Imajen/Tatoli.

DILI, 21 outubru 2019 (TATOLI) – Ministru Transporte no Komunikasaun (MTK) asina ona akordu ka air service agreement ho nasaun Uni Emirates Arab, foin lalais ne’e, iha Kanadá atu dezigna sira-nian aviaun mai Timor-Leste, maibé presiza kondisaun infraestrutura aeroportu ne’ebé mak sufisiente.

“Sira hatudu prontidaun hodi dezigna sira-nia aviaun mai Timor-Leste hodi halo operasaun, maibé kondisaun infraestrutura ita-nia aeroportu maka seidauk sufisiente”, dehan Ministru José Agostinho da Silva ba Ajénsia Tatoli iha nia knaar fatin Kaikoli, ohin

Nia haktuir konteúdu husi akordu ne’ebé foin lalais nia asina ho Uni Emirate Arab iha Kanadá bainhira reprezenta Governu Timor-Leste hodi partisipa iha Konferénsia Organizasaun Mundiál Aviasaun Sivíl mak sira hakarak halo operasaun iha Timór.

Tanba ne’e, atu rezolve kestaun refere Governu liuhusi liña ministeriál lima hanesan Ministru Prezidénsia Konsellu Ministru, Ministru Negósiu Estranjeiru, Ministériu Finansa, Ministru Obra Públika inklui MTK kontinua esforsu atu koordena ho Governu Japaun ba Konstrusaun Aeroportu Dili.

“Ita-nia kompromisu hakarak aeroportu ne’ebé di’ak, iha kondisaun di’ak nune’e bele akumula aviaun sira iha nasaun sira seluk atu mai Timor-Leste. Tanba ne’e ministériu kontinua esforsu hodi halo koordenasaun ba kestaun ne’e liuliu ba infraestrutura ita-nian aeroportu nian”, dehan Ministru José Agostinho.

Ministru dehan nasaun Uni Emirates Arab iha aviaun boot akomoda pasajeiru 500-resin ba vou dala ida tanba ne’e Timor-Leste mós tenke iha infraestrutura aeroportu no ho pista ne’ebé maka di’ak pur volta metru 3000 no mínimu 2.500

“Agora, obstákulu ba ita maka ne’e, kondisaun infraestrutura aeroportu ne’ebé maka seidauk sufisiente tanba ita-nian pista ne’e ki’ik labele akumula aviaun boot sira”.

Enkuantu pista husi Aeroportu Internasionál Nicolau Lobato, agora ne’e, ho metru 1.850.

Iha sorin seluk, Prezidente Autoridade Nasionál Aviasaun Sivíl Timor-Leste (AACTL), Ana Rosália Ximenes Varela, hateten aviaun husi nasaun sira mai halo operasaun iha Timor-Leste ne’e iha oin rua mak charter flight no designate flight.

Tuir Ana Rosália se charter flight ne’e kompañia nasionál mak hakarak aluga aviaun husi rai-li’ur mai atu halo operasaun iha Timor-Leste, maibé designate flight ne’e akordu entre Governu ho Governu.

“Husi AACTL ami prontu hasai lisensa enkuantu aviaun ida husi nasaun seluk prienxe hotu ona rekizitu husi AACTL nian”, dehan Ana Rosália.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here