Estrada kuaze metru 200 ne’ebé Empreza Sun Rice Golden ladauk konstrui tanba problema hela no prosesu iha ona Tribunál Distritál Dili. Imajen/Florencio Miranda Ximenes.

DILI, 21 outubru 2019 (TATOLI) – Ministériu Obra Públika (MOP) no Empreza Sun Rice Golden hein desizaun Tribunál atu kontinua konstrui estrada kuaze metru 200 ne’ebé paradu iha área Mota Beduku, Aldeia Rai-hun, suku Manleuana, postu administrativu Don Aleixo, Munisípiu Dili.

Projetu konstrusaun ladauk halo tanba kazu ne’e rejista ona iha Tribunál Distritál Dili (TDD). Enkuantu kompañia timoroan nian ida mak hala’o atividade pedreira ka dulas fatuk iha fatin ne’ebá.

“Kompañia kontraktor hakat liu kuaze metru 200, tanba problema ne’e mosu iha Sestu Governu empreza ida harii pedreira iha ne’ebá, ami tenta negosia, maibé la konsege tanba kompañia la koopera. Iha Sétimu Governu ami hato’o hikas fali, maibé prosesu ne’e to’o ona iha tribunál, ne’ebé ami hein hela bainhira mak prosesu ne’e bele remata no hetan desizaun atu kompañia kontinua obra ne’e”, Diretór Jerál Ministériu Obra Públika, Rui Hernani, ba ajénsia Tatoli iha knaar fatin, ohin.

Rui Hernani dehan daudaun ne’e atividade pedreira mós la la’o ona, maibé empreza sei hein hela prosesu no desizaun Tribunál.

“Tuir loloos, Governu tenke halo ona despeza para empreza bele akapta hodi hala’o tiha obra ne’e, maibé komu asuntu ne’e iha ona Tribunál, ita tenke fiar no hein desizaun Tribunál”, dehan nia.

Diretór Jerál MOP ne’e salienta laiha koñesimentu ba prosesu lori empreza pedreira ne’e ba Tribunál, maibé MOP no empreza hein de’it desizaun Tribunál atu kontinua obra Estadu ne’e.

Tuir dadus ne’ebé Tatoli, asesu iha orsamentu Estadu 2018, iha fundu infraestrutura, aneksa 7: reabilitasaun estrada (rehabilitation of roads) Dili‐Manleuana‐Solorema‐Aileu 15 km, (total 9 projects), ho kódigu BL‐8090252.

Projetu reabilitasaun estrada Dili-Manleuana bá Solorema-Aileu ne’e kilómetru 15 ne’ebé kuaze pakote sia ne’ebé ka’er husi empreza sia.

Enkuantu, Dili Reconstruction of road (Ex. Japan, Dili) Location Dili‐Beduku‐Sarlala‐Aileu (Kasnafa‐Urtukin) ka’er husi empreza Sun Rice Golden ho orsamentu $3,138,362, hahú husi dezembru 2017 to’o 2021.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here