Ministru Ensinu Superiór, Siénsia no Kultura, Longuinhos dos Santos. Imajen/TATOLI

DILI, 21 outubru 2019 (TATOLI)- VIII Governu Konstitusionál liu husi Ministru Ensinu Superiór Siénsia no Kultura (MESSK) prevee ona orsamentu ba transferénsia Públika hodi apoiu Institutu Públiku no privadu sira  ho montante rihun 75.

“Orsamentu ne’e ita prevee hodi aloka ba instituisaun privadu no públika sira ne’ebé hetan ona akreditasaun, ita sei fó apoiu  bazeia ba rekomendasaun katak instituisaun ne’e hatudu ona ninia valór diak,”  hateten Longuinhos dos Santos ba Ajénsia TATOLI iha edifísiu Fundu Dezenvolvimentu Kapitál Umanu (FDCH), segunda (21/10/2019).

Ministru Longuinhos dos Santos kompromete katak governu sei promove bolsu estudu no mós koloka subsídiu ba instituisaun akadémika ne’ebé nia ema sira hetan valór di´ak.

“Alokasaun orsamentu husi tranferénsia Públika nian kada tinan ita prevee ona rihun 75. Orsamentu ne’e ita tau hodi ajuda Instituisaun Ensinu Superiór sira ne’ebé akreditadu ona,” hateten ministru.

Nia dehan maske governu preve ona orsamentu tranferénsia públika hodi apoiu instituisaun ensinu superiór sira maibé antes ne’e ministériu tenke avalia uluk depois mak foin bele foti desizaun apoiu ka lae.

Kuandu instituisaun akreditada sira ne’e mak hetan avaliasaun ho rejultadu di´ak MESSK sei tulun sira ho programa bolsu estudu.

Alende apoiu bolsu estudu, Longuinhos afirma programa prioridade ba instituisaun privadu sira mak loke formasaun ka  kursu lian portugés ne’ebé kada tinan hala´o hela. “Ida ne’e ita halo tanba hakarak eleva kualidade instituisaun ensinu superiór sira atu prepara di´ak liután ninia rekursu”.

Tanba ne’e preokupasauun Instituisaun privadu sira nian katak governu nunka  preokupa sira ne’e laloos. Planu no programa anual nian iha ona hodi ajuda instituisaun sira ne’e. Ne’e,duni apoiu ne’ebe govérnu aferese la hateten ba instituisaun públika ka privada.

Labele Abandona 

Antes ne´e, Magnífíku Reitór Institútu Superior Cristal (ISC) Sebastião Pereira, hateten institutu  privadu ne’ebé hetan ona akreditasaun iha direitu hetan tratamentu hanesan mós institutu públiku sira hanesan Universidade Nasionál Timor Lorosa´e (UNTL) no IPB (Institutu Politékniku Betanu).

Razaun, tuir akadémiku ne´e katak Institutu privadu sira dala barak garante ninia dezenvolviméntu institusionál ne’e husi propina ne’ebé estudante sira apoiu no parte governu konsidera institutu privadu sira hetan apoiu husi organizasaun privadu sira.

“Loloos ne’e kuandu Institutu Privadu ne’ebé akredita ona, governu iha obrigasaun atu fó apoiu tanba institutu ne’e hola parte ona iha rede ensinu superiór internasionál, labele separa tan ona,” friza Magnífiku Reitór Sebastião ba ajénsia TATOLI iha ninia kna’ar fatin Edifísiu ISC Balide, sabado (21/10/2019).

Nia dehan, la presija haree buat barak kuandu estatutu Institutu privadu ne’ebé mak akredita ona internasionalmente hola parte ona iha rede internasionál bele ona hetan apoiu husi governu maibé tuir nia iha TL maske Institutu privadu bele akredita ona maibé apoiu husi govérnu mínimu nafatin.

“Problema ne’ebé mak ita hasoru orsamentu atu dezenvolve institútu Privadu mak la to’o. Governu la tau prioridade. Agora Ita hakarak husu de’it estudante sira eskola iha Institútu privadu ne’e Timor nia oan ka ema husi rai seluk nia oan,” nia konsidera.

Tanba ne´e, Reitór Sebastião husu ba Governu liuhusi Ministru Ensinu Superiór Siénsia no Kultura (MESSK) atu labele abandona instituisaun privadu sira. Governu presiza hanoin kuandu Institutu privadu sira mak la hamriik oinsá governu atu fasilita estudante sira.

Hadi´a kualidade instituisaun nian hodi hetan rekursu umanu ne’ebé poténsia governu tenke fó tratamentu hanesan tanba tuir akadémiku ne´e iha futuru rekursu umanu ne’ebé institutu privadu sira prodús ka forma sei servisu hodi dezenvolve fali nasaun ne’e.

Jornalista :Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here