Hakerek na´in Noe Bernardino Ximenes

DILI, 21 outubru 2019 (TATOLI)—Hakerek nu’udar instrumentu luta ida-nian. Dalaruma atu hakerek ita presiza luta. Hakerek la’ós instrumentu sira [hanesan komputadór, lapijeira nsst] ne’ebé prioridade maibé buat ida ne’ebé prinsipál liu mak espiritu no klamar. Hakerek la’os tanba halo kontente-aan de’it maibé hakerek nu’udar instrumentu luta ida-nian ne’ebé hakarak atu halo mudansa ka transformasaun.

Hakerek na´in Noe Bernardino Ximenes.

Hodi tuba no sadere ba liafuan kmook iha leten ne’eba mak lori fanu ha’u hadeer atu hakerek no hakerek. Hori ki´ik kedas, hori ha’u [Noe Bernardino Ximenes] moris iha mundu ne’e [Pitileti, Com, Lautem, Lospalos, 20 Novembru 1988] to’o ha’u tuur iha banku ensinu superiór [UNTL, Fakuldade Siénsia Sosiais no Polítika, agora livre teória], ha’u gosta lee no gosta hakerek sá mak ha’u hakarak lee no hakerek.

Hori moris ne’e fó moris ba ha’u, ha’u gosta nanis atu hakerek. Tanba, hakerek halo ha’u livre no sente ondradu. Alende ne’e, husi hakerek ne’e mós ha’u bele espresa ha’u-nia sentimentu liuhusi ideia konstrutiva. No, ba ha’u, hakerek ne’e hanesan kilat musan ida ne’ebé kro’at liu armas hotu.

Ha’u-nia inspiradór, liuliu iha Timor-Leste, ne’ebé inspira ha’u atu hakerek mak Dr. Anteiro Bendito. Iha mundu, eskritór ida ne’ebé inspira ha’u atu lee no hakerek beibeik mak eskritór idealizmu ida naran Karl Marx. Onestu! Ha’u gosta lee Karl Marx nia artigu no livru sira ne’ebé nia hakerek. Razaun simples! Tanba Karl Marx nia artigu hotu ko’alia kona-ba valór umanu la’ós ko’alia kona-ba valór materiál. Ha’u gosta ida ne’e.

Dom Martinho Lopes: Misionáriu no Eroi Umanidade

Tanba ida ne’e, aprende husi Karl Marx nia artigu no livru sira ne’ebé ha’u sani, sadik ha’u atu hakerek kona-ba timoroan ida-nia luta ba umanidade no luta ba povu no rai lulik Timor-Leste nia autodeterminasaun. Ha’u laran-monu ba Dom Martinho da Costa Lopes nia luta. Luta ida ne’e  sadik ha’u hakerek tebes duni livru ida ba Dom Martinho Lopes ho títulu “TIMOR LESTE NE’EBÉ HALUHA NO SEI FUNU TO’O MATE MOHU”.

Ba dahuluk, ha’u laran monu hakerek Dom Martinho da Costa Lopes nia istória tanba nia úniku Igreja Katólika nia ema ne’ebé defende direitus umanus hahú husi kolonializmu Portugal. Nia luta defende timoroan sira-nia direitu, hahú  iha tinan 1957 bainhira nia hetan ka simu mandatu hanesan deputadu Timor ba Portugal iha asembleia Portugal dezde 1957 to’o 1963. Nia afirmasaun klaru tebes hodi hatete iha asembleia ba governasaun Portugal atu hapara ukun palmatóriu ho sikote hasoru povu Timor-Leste.

Iha tinan 1975, antes proklamasaun independénsia iha 28 Novembru 1975, bainhira nia lidera Jornál SEARA [jornál Dioseze Dili] iha tinan 1973, nia fó oportunidade ba timoroan sira atu hakerek opiniaun públika sobre sofrimentu povu no rai Timor-Leste nian hodi publika iha jornál refere.

Iha Portugal nia ukun, ho Dom Martinho Lopes ninia influénsia lori timoroan ua’in konsege hakerek duni artigu lubun ne’ebé kro’at hodi kontra Governu Portugal. Ezemplu, bainhira José Ramos Horta kakerek opiniaun públika kona-ba “Maubere o Meu Irmão”, Governu Portugal obrigatoriamente taka Jornál SEARA tanba de’it deskonfia igreja mós halo ka mete polítika.

Iha ámbitu rezisténsia 1975 to’o 1983, Dom Martinho da Costa Lopes mak inísia ideia hodi muda postura polítika rezisténsia bainhira hasoru malu ho Komandante da Luta Kay Rala Xanana Gusmão iha Raja Miguel nia uma iha Mehara, Lospalos. Razaun, tanba altura ne’e mundu [liuliu Amérika] lakoi fó apoiu tanba Forças Armadas de Libertação Nacional de Timor-Leste (FALINTIL) no Frente Revolucionária de Timor-Leste Independente (FRETILIN) adopta ideolojia Marxista Lenenista (komunista).

Ha’u gosta hakerek Dom Martinho da Costa Lopes nia istória tanba nia aleinde hanesan misionáriu ida, nia mós hanesan eroi-boot ida ba povu no rai lulik Timor-Leste. Tanba, iha biban ne’ebá, Dom Martinho Lopez de’it mak nu’udar eroi ida ne’ebé salva povu Timor-Leste husi violasaun direitus umanus hanesan troturasaun, violasaun seksuál, oho, ema lakon, no kastigu ema lahó julgamentu.

Iha biban ne’ebá, Dom Martinho Lopez nu’udar eroi umanidade ida ne’ebé tropa Indonézia sira ka rezime Soeharto konsidera Dom Martinho Lopes hanesan “PADRE KOMUNISTA” ida. Maibé, Dom Martinho Lopes la preokupa no hamutuk nafatin ho povu no sarani Timor-Leste hodi luta no ko’alia beibeik “Lia-Loos” ba mundu tomak.

Onestu de’it! Dadus hirak ne’ebé ha’u katak sai, ha’u hetan no deskobre liuhusi peskiza durante tinan ida-nia laran (2017-2018). Métodu ne’ebé mak ha’u uza ba peskiza ne’e mak utiliza kuestionáriu, entervista, dokumentasaun no foku mós ba iha grupu diskusaun sira. Dadus sira ne’e, ha’u elabora sai livru ne’e durante fulan neen (6) nia laran, husi Novembru 2018 to’o Maiu 2019.

Lisaun Umanidade

Lisaun umanidade ne’ebé mak ha’u hetan hafoin hakerek livru ida ho titulu “TIMOR LESTE NE’EBÉ HALUHA NO SEI FUNU TO’O MATE MOHU” mak hatudu katak luta ba libertasaun Timor-Leste ne’e, hetan apoiu iha mundu konta mós ho Igreja Katólika nia kontribuisaun liu-liu individu Dom Martinho da Costa Lopes.

Hau refleta, lisaun kmanek ba leitór sira mak livru ne’e atu fó hatete katak istória libertasaun nasionál loloos ne’e konta mós ho individu Dom Martinho da Costa Lopes ninia luta no kontribuisaun. Livru ida ne’e, atu fó mensajen katak aleinde nia ema misionáriu ida nia mós hanesan ema santu ida tanba hala’o nia knaar evanjelizasaun hodi defende nia sarani sira iha tempu kruel nia laran.

Dom Martinho Lopes hanesan eroi-boot ida tanba nia iha vontade atu husik serbisu no nia sarani sira iha Timor-Leste hanesan ema misionáriu ida hodi hala’o knaar iha Portugal no iha mundu hodi ko’alia kona-ba autodeterminasaun povu no rai Timor-Leste la sente kolen.

Tuir planu, ha’u informa ba sani-na’in sira, livru ida ne’e ha’u sei imprime to’o edisaun tolu. Edisaun primeiru ne’e hamutuk pájina 160 no edisaun tuir mai sei tuir padraun hakerek livru nian to’o pájina 250 no bele liu ida ne’e konforme bazeia kapasidade peskiza no ekipa serbisu.

Daudaun ne’e, ha’u iha kapasidade vontade no siénsia hakerek livru de’it maibé laiha kapasidade finanseiru atu imprime livru refere. Ha’u hein katak timoroan balun bele ajuda imprime livru ne’e halo barak no timoroan sira bele hetan no lee memória pasada liuhusi Dom Martinho Lopes nia istória.

Livru refere, ha’u hakerek ho dalen Tetun maibé Tetun versaun Igreja Katólika nian. Ba Tetun padraun Insitutu Nasionál Linguistika (INL) nian, to’o agora ha’u seidauk iha padraun legál ruma. Karik, ba futuru, ha’u sei bele uza tetun ortografia padronizada INL ninian.

Tanba hakerek nu’udar instrumentu luta ida-nian, entaun ba timoroan sira ne’ebé hakarak sosa livru kona-ba Dom Martinho da Costa Lopes ho títulu “TIMOR LESTE NE’EBÉ HALUHA NO SEI FUNU TO’O MATE MOHU” ne’e, ita-boot sira bele sosa iha Studiu Mua-Cau iha Caicoli, Dili, Timor-Leste, ho presu $15 kada livru ida. Kontrubui ba! No, sosa ba!

Jornalista: Cancio Ximenes

Editór      : Rafy Belo

2 KOMENTÁRIU

HAKEREK NO HATÁN

Please enter your comment!
Please enter your name here