Ministru Obra Públika, Salvador Eugénio Soares dos Reis Pires (loos) no Diretór Jerál MOP, Rui Hernani (karuk). Foto/mídia MOP.

DILI, 21 outubru 2019 (TATOLI) – Governu liuhosi ekipa interministeriál hanesan Ministériu Obra Publika, Ministériu Agrikultura no Peska (MAP), Ministériu Justisa liuhusi Sekretáriu Estadu Terras no Propriedade negosia ona abitante afetada iha area Beheda-Manatutu, atu husik fatin ne’e hodi empreza konstrui estrada.

“Ita-nia abitante afetadu sira iha Beheda no fatin seluk ne’e, ekipa tékniku liña ministeriál hala’o tiha ona konsulta públiku no tama ba faze identifikasaun, bainhira finaliza mak sira (abitante) kria konta bankária hodi transfere osan no fó tempu fulan tolu ba sira husik fatin ne’e atu Governu haruka ona empreza halo alargamentu”, Diretór Jerál Ministériu Obra Públika, Rui Hernani, ba Ajénsia Tatoli iha Faról, ohin.

Husi MAP mak fó sai kona ba ai-horis no uma ne’e MOP mak responsabiliza tanba presiza de’it rai. Kuandu rai mak hanesan propriedade Estadu no privadu ne’e rezolve husi Terras no Propriedade

Diretór Jerál ne’e dehan abitante afetada iha área Beheda-Manatutu ekipa sei hala’o identifikasaun, ne’ebé finaliza mak foin hatene abitante ne’e hira.

“Ami presiza rai, maibé atu liberta ne’e presiza entidade hotu-hotu nia responsabilidade, ne’ebé ami hala’o identifikasaun no hato’o ba leten (ezekutivu) foti desizaun ne’e ita hahú selu”, katak.

Progresu reabilitasaun ba estrada protokolu Dili bá Manatutu kuaze 60%, Manatutu bá Baukau 80%, Baukau bá Lautein serka 45%.

Antes ne’e, Ministru Estadu Prezidénsia Konsellu-Ministru, Hermenegildo Augusto Cabral Pereira, informa deliberasaun ne’e mai husi Ministériu Obra Públika, ho proposta alterasaun kontratu konstrusaun estrada Dili-Manatutu, ne’ebé hanesan empréstimu ida mai husi Japaun liuhosi Ajénsia Kooperasaun Internasionál Japaun (JICA, sigla inglés).

“Konsellu-Ministru aprova duni iha proposta alterasaun kontratu, ne’ebé JICA mós konkorda no data foun atu kompleta obra ne e mak 20 maiu 2020”, informa Ministru Hermenegildo Pereira sira iha Palásiu Governu, foin lalais ne’e.

Nune’e mós governante ne’e informa, proposta deliberasaun ida tan mak hetan aprovasaun hodi halo alterasaun kontratu estrada Baukau-Lautein, hanesan empréstimu husi Banku Aziátiku Dezenvolvimentu (ADB, sigla inglés).

“Konsellu-Ministru aprova duni data foun konkluzaun ba obra ne’e mak 21 fevereiru 2020”, informa tan ministru.

Entretantu, obra konstrusaun estrada Dili-Baukau ho naruk kilómetru 118 hahú iha 1 jullu 2013, no fonte finansiamentu empréstimu husi JICA hamutuk millaun $68,7 no Governu Timor-Leste finansia millaun $23,9.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here