DILI, 21 outubru 2019 (TATOLI)–Komunidade hirak ne’ebé konstrui uma iha zona protejidu Lagoa Tasi Tolu sei la hetan notifikasaun antes tanba rai ne’e Estadu nian no Estadu liuhosi Governu aviza beibeik ona hodi la admite kualkér sidadaun atu konstrui uma iha Lagoa Tasi Tolu nian.
Notísia Relevante: Lei La Autoriza Xefe Suku Halo Atribuisaun Rai Estadu Ba Komunidade
Hafoin informa situasaun sira prosesu eviksaun okupante uma kain 36 iha Lagoa Tasi Tolu ba Ministru Justisa (MJ), Manuel Cárceres da Costa, ohin, Sekretáriu Estadu Terra no Propriedade (SEPT), Mario Ximenes, afirma, iha eviksaun ne’e ema balun tau kestaun tanba la iha notifikasaun antes. Maibé tuir SETP Mario Ximenes, Governu la bele halo notifikasaun tanba ema sira ne’e konstrui uma iha tempu kalan de’it.
“Ami halo tiha eviksaun maka okupante sira mosu mai dehan sira mak nain ba uma. Mas, kuandu sira harii uma ne’e kalan de’it no difisil atu Governu notifika,” hateten Mario Ximenes, hodi afirma mós katak, uma kain 36 ne’ebé Governu hasai sei la hatán indemnizasaun.
“Lagoa Tasi Tolu hanesan fatin turístiku no sítiu istóriku ne’ebé Estadu presiza prezerva,” hateten Mario Ximenes.
Jornalista : Domingos Piedade Freitas
Editór : Francisco Simões
