DILI, 21 outubru 2019 (TATOLI)-Familia boot husi matebian eis Ministru Defeza, Cirilo Cristóvão, hahú hala’o ona preparasaun iha uma Pantai Kelapa, Dili, hodi simu mate isin matebian Cirilo Cristóvão ne’ebé sei transporta hosi Bali mai Timor-Leste, tersa aban (22/10/2019).
Eis membru VI Governu Konstitusionál periodu (15 marsu 2015 -15 marsu 2017) hakotu iis iha Ospitál Bros, Denpasar, Indonézia, iha tuku 19:45, hafoin halo tratamentu saúde iha ospitál refere.
Mate isin agora daudaun rai ona matebian nian uma iha Bali akompaña hosi oan no família sira inklui reprezentante Estadu Timor-Leste nian.
Brigida Antonia Correia, espoza husi matebian ho família balun ohin arranka ona hosi Timor-Leste ba Bali, Indonézia, hodi halo preparasaun lori fila matebian nia isin mate mai Timor-Leste.
Tuir observasaun Ajénsia TATOLI nian iha matebian nia uma, hatudu katak, família matebian ne’ebé tinan barak asume mós kargu hanesan Diretór Serbisu Nasional Intelijénsia (SNI) hahú dada tenda inklui hein lia nain sira husi Lospalos mai Dili hodi halo enkontru preparasaun.
Tuir oráriu, mate isin to’o iha Dili sei rai kalan ida iha nia rezidénsia Pantai Kelapa no loron tuir mai sei lori matebian ba Titilari -Lospalos hodi halo serimónia funebre.
Jornalista : Eugénio Pereira
Editór : Francisco Simões
