Diretór Escola Comercio Becora Adérito L. da Costa.Imajen/TATOLI

DILI, 21 outubru 2019 (TATOLI)—Diretór Eskola Sekundária Tékniku Vokasionál-Eskola Ekonomia no Komersiu (ESTV-EEC) Becora, Aderito Luis da Costa, hateten sira iha planu atu loke tan departamentu bankaria hanesan finansa atu kompleta departamentu tolu seluk ne’ebé iha tiha ona .

“Iha ne’e, ami iha departamentu tolu ona hanesan Komersiu, Kontabilidade ho Sekretariadu. Ami hakarak atu loke tan fali departamentu bankaria hanesan finansas, tanba ne’e ami ko’alia kona-ba asuntu ne’e nian,”  dehan Diretór Eskola, Aderito Luis da Costa, ba Ajénsia TATOLI iha nia knaar fatin, loran hirak liu ba.

Vizaun primeiru, nia hatutan, eskola iha ona vontade boot hakarak kontinua hodi loke departamentu ida hodi halo kontinuasaun ba eskola ekonomia ida ne’e. Vizaun tuir mai, nia dehan, ESTV-EEC hakarak ko’alia ho Edukasaun Nasionál liuliu Ministra Edukasaun no SEFOPE no mós instituisaun privada no naun privadu sira seluk para bele fó dalan atu loke kontinuasaun instituisaun ida ne’ebé iha ligasaun kona-ba ekonomia.

Diretór ne’e hatutan, iha ESTV-EEC ne’e manorin na’in sira sufisiente ona tanba iha maestradu hamutuk ema na’in 15 ne’ebé estuda kona-ba área ekonomia nian, doutoramentu na’in ida, Diploma (S3) na’in ida estuda kona-ba área ekonomia nian.

Nia reforsa tan katak, profesór sira iha eskola refere balun hanesan dosente hanorin iha universidade. Profesór na’in 15 ne’e mesak ema dosente de’it. Balun iha universidade hanesan dekanu, balun hanesan orientadór ne’ebé eskola laran metin katak eskola ne’e bele loke tan instituisaun foun. Tanba eskola ne’e nia hakarak la’ós atu sai instituisaun privada maibé sai hanesan instituisaun estadu nian.

Iha parte seluk, manorin ne’e informa, konstrusaun ba eskola ida ne’e mós konstrusaun estadu ne’ebé Indonézia husik hela ita Timor mós sufisiente ona. Iha ne’e, falta de’it atu halo reabilitasaun no mós ba ninia ekipamentu seluk ne’ebé bele kompleta ba loron ikus.

“Ida ne’e ha’u-nia vizaun tuir mai. Agora daudauk ha’u mós bolu ona, ha’u-nia kolega sira aruma sira-nia dokumentus tomak, sira eskola iha universidade balun iha Indonezia, Portugal, balun iha Austrália, agora sira hanorin iha ne’e no mós hanorin mós iha universidade sira seluk,” nia dehan.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here