Embaixadór Austrália iha Timor-Leste, Peter Llewilyn Roberts. Imajen Tatoli/Cipriano Colo

DILI, 21 outubru 2019 (TATOLI)–Embaixadór Austrália iha Timor-Leste, Peter Llewilyn Roberts, hasoru malu ho Prezidente Repúblika (PR), Francisco Guterres Lú Olo iha Palásiu Prezidente Nicolau Lobato, Bairru Pité, ohin, hodi ko’alia kona-ba relasaun bilaterál entre nasaun rua.

Hafoin enkontru, Peter ba mídia hateten, durante enkontru, embaixadór ne’e ko’alia liu kona-ba relasaun bilaterál entre nasaun rua, ne’ebe iha fulan kotuk, xefe misaun INTERFET, Peter John Cosgrove hamutuk ho Ministru Defeza Austrália nian, Ministru Negósiu Estranjeiru no Ministru Veteranu hala’o vizita mai Timor-Leste (TL).

Embaixadór Peter konsidera katak vizita ne’e iha sentidu katak Austrália hakarak tebetebes ho vontade tomak atu hametin liután kooperasaun bilaterál, liuhusi Selebrasaun Tinan 20 Konsulta Populár, Austrália mós hatudu prontidaun atu serbisu hamutuk ho TL ba futuru.

Oras ne’e daudaun, tuir nia, Austrália ho Timor-Leste halo kooperasaun iha área oioin, tanba asina ona tratadu Fronteira Marítima (FM), tan ida ne’e mak oportunidade di’ak atu hametin no haburas liután kooperasaun iha seguransa marítima, ekonomia no seluk-tan.

Peter mós relata katak Prezidente Repúblika konsidera enkontru ne’e importante tanba relasaun bilaterál entre Timor-Leste ho Austrália importante tebes no presiza dezenvolve hamutuk.

Peter mós aproveita oportunidade hodi agradese ba Prezidente Repúblika, tanba iha semana rua liubá, embaixadór ne’e mós akompaña Xefe Estadu ba hala’o vizita iha fábrika mina nuu iha Lospalos ne’ebé hetan apoiu hosi Austrália.

Jornalista: Cipriano Colo
Editor: Xisto Freitas

HAKEREK NO HATÁN

Please enter your comment!
Please enter your name here