Reprezentante Ajénsia Ramelau Travel, Francisco Martins. Imajen TATOLI/Antónia Gusmão.

DILI, 21 outubru 2019 (TATOLI) – Reprezentante Ajénsia Ramelau Travel, Francisco Martins, konsidera marka turizmu Timor-Leste nian atrai liután sira-nia kliente (turista) hodi deskobre poténsia Timór nian.  

“Hanesan ajénsia viajen ami sente atividade sensibilizasaun ne’e di’ak tebes. Tanba fó oportunidade mós ba ami hodi hato’o ba ami-nia kliente sira hosi nasaun sira seluk bele koñese mós Timór nia turizmu ne’ebé deside ona iha slogan Timor-Leste Explore the Undiscovered. Ida ne’e di’ak tanba bele atrai kliente sira liuliu ba ami-nia kliente rasik”, hateten Francisco Martins ba jornalista sira hafoin partisipa sensibilizasaun Marka Turizmu Timor-Leste iha Sentru Konvensaun Dili (CCD, sigla portugés), ohin.

Francisco Martins afirma hosi marka turizmu ne’e atrai kliente sira nune’e hetan buat foun iha Timór ne’ebé iha fatin seluk laiha.

“Ita-nia kultura ne’ebé úniku maka hanesan uma-lulik, feto-san-umane, dalaruma ami-nia kliente sira hakarak hatene detallu kona-ba ida ne’e, hanesan mós área turizmu foho Ramelau, bee-manas Marobo. Fatin sira ne’e ha’u hanoin di’ak ba ami no sai marketing di’ak mós ba ami nune’e iha ami-nia publisidade bele tau mós marka ida ne’e”, dehan Francisco hodi husu atubele utiliza marka turizmu ba sira-nia publisidade, nune’e bele atrai liután turista sira.

Hatán ba ida ne’e, Diretór Nasionál Promosaun Turístika no Relasaun Internasionál, Edson Noronha, dehan sé de’it bele uza marka ne’e, importante labele uza sai hanesan negósiu.

“Se de’it bele uza marka sira ne’e, maibé labele uza hodi buka lukru. Kritéria maka haruka de’it karta ba diresaun turizmu hodi hetan autorizasaun”, dehan Edson.

Notísia relevante : MTKI Sensibiliza Marka Turizmu Timor-Leste Atu Entidade Hotu Koñese

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here