Xefe Departamentu Planeamanetu Diresaun Rejionál Edukasaun RAEOA, Cancio Koa. Imajen Jogerjo Guterres

OEKUSI, 20 outubru 2019 (TATOLI) – Autoridade Rejiaun Administrativa Espesiál Oekusi Ambenu (RAEOA) ba Asuntu Edukasaun seidauk iha planu atu loke eskola ensinu sekundáriu iha suku Beneufe hodi akumula estudante husi Citrana ho Baoknana tanba seidauk prienxe kritériu.

Xefe Departamentu Planeamentu Diresaun Rejionál Edukasaun RAEOA, Cancio Koa, hatete 2017 autoridade loke ona eskola ensinu sekundáriu haat, sub rejiaun Oesilo iha rua, ida iha Vila no ida seluk iha suku Usitasae, ida iha sub rejiaun Pásabe no ida seluk iha Haubenu, suku Lelaufe, sub Rejiaun Nitibe.

Hafoin halo instalasaun, nia dehan alunu ladún barak, tanba barak mak hakarak mai eskola iha Oekusi Vila ho razaun atu aprende ko’alia tetun ho di’ak. Kestaun seluk mak autoridade husi sub-rejiaun la halo sosializasaun ba komunidade. Tanba ne’e maka eskola ida iha Pásabe taka fila fali tanba ema laiha.

Baoknana, autoridade seidauk iha planu atu loke ensinu sekundáriu tanba seidauk prenxe kritériu. Katak, kada tinan, mínimu tenke iha alunu 50.

“Ensinu sekundáriu tolu ne’ebé la’o ona, balun mós seidauk atinje alunu 50 kada tinan, tanba barak hakarak atu eskola iha vila, no dalaruma klase ida ema nain 15 to’o 30 deit”, nia hateten.

Ho referénsia sira ne’e, daudaun ne’e Baoknana seidauk prenxe rekezitu, no ninia parte observa katak seidauk bele harii ensinu sekundáriu.

Cancio hatán ba preokupasaun xefe aldeia Manan, suku Beneufe, sub rejiaun Nitibe, Marcos Obe, ne’ebé husu atu harii eskola ensinu sekundáriu, nunee labarik sira bele eskola de’it iha Baoknana.

Xefe Aldeia Manan, suku Beneufe, sub rejiaun Nitibe, Marcos Obe. Imajen Jogerjo Guterres

“Ami nia dalan ladun di’ak, distánsia to’o Vila mós dook, tanba kritériu ami nia oan sira remata ensinu terseiru sikulu, tenke ba Vila”, Marcos husu.

Preokupasaun hanesan hato’o husi komunidade aldeia Manan, Cosmas Olin. Nia husu atu autoridade loke eskola ensinu sekundáriu hodi fasilita labarik sira.

“Se bele loke eskola ensinu sekundáriu ida iha kritériu, tanba ami nia oan sira hotu-hotu tenke ba kontinua iha Vila”, Cosmas husu.

Entretantu, distánsia husi Oekusi Vila to’o Citrana kuaze kilometru 50.

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here