SEII Maria José Fonseca de Jesus Monteiro, hamutuk ho feto potensiál sira no oradór mane sira halo abertura ba seminaríu kona-ba Lideransa Feto iha Nivel Munisípiu ne'ebé hala'o iha Ótel Ramelau, sesta (18/10/2019). Imajen/Osória Marques

DILI, 19 outubru 2019 (TATOLI)-Partisipasaun feto iha lideransa nivel suku nian foin porsentu lima (5%) no nivel nasionál iha Funsaun Públiku 34,6%. Tanba ne’e, presiza iha esforsu no kolaborasaun hosi entidade hotu-hotu atu bele atinje polítika igualdade jéneru.

Notísia Relevante : Lidera Grupu Traballu Jéneru Munisipál, SEII Atribui Kompeténsia Ba Prezidente Autoridade

Sekretária Estadu Igualdade no Inklusaun (SEII), Maria José da Fonseca Monteiro de Jesus. Imajen/Osória Marques

Ho persentajen ne’e, Sekretaria Estadu Igualdade no Inkluzaun (SEII), Maria José Fonseca de Jesus Monteiro, hateten, governu liuhosi SEII iha planu estratéjia polítika nasionál  halo advokasia no kapasitasaun atu partisipasaun feto di’ak liu tan iha nivel oioin iha prosesu hotu ne’ebé la’o iha Timor-Leste.

SEII hanesan mákina Estadu ne’ebé mak sai responsável ba promosaun igualdade no inkluzaun ninian. Tanba ne’e, Maria José Fonseca de Jesus Monteiro, aprofunda katak, iha fulan tolu nia laran SEII hala’o ona kongresu asosiasaun feto potensiál iha munisipiu sira hotu inklui Rejiaun Administrativu Espesiál Oe-Cusse Ambeno (RAEOA) hodi bele ajuda serbisu iha nivel oioin atu haree oinsá mak hamutuk tau esforsu atu identifika feto maluk potensiál sira no prepara feto maluk sira atu bele kompete kuandu iha oportunidade.

Notísia Relevante : SEII ho Sosiedade Sivíl Fó Advokasia Ba Kombate Violénsia Doméstika

“Governu mos nafatin halo advokasia iha munisípiu sira hotu atu assegura rekrutamentu promosaun no nomeasaun sira atu nune’e haree ba balansu jéneru no assegura ema ho defisiénsia ninian no iha mos funsionalizmu públiku iha instituisaun Governu,” hateten SEII Maria José Fonseca de Jesus Monteiro, ba jornalista iha Otél Ramelau, Dili, sesta (18/10/2019).

Notísia Relevante : SEII Sei Fó Subsídiu Kada Suku $10.000

Liuhosi semináriu Lideransa Feto iha Nivel Munisípiu ho tópiku “Investe Feto, Investe Futuru”, reprezenta Embaixador Japaun iha Timor-Leste, Misato Taki, hateten, Governu Japaun   ajuda Governu Timór dezde 1999 to’o agora kona ba estabelesimentu polítika no assistente ne’ebé mak Japaun oferese.

“Ha’u fiar katak semináriu ne’e sai hanesan xave importante ba feto lideransa sira iha nivel munisípiu no liuhosi eventu ida ne’e partisipante bele  kontribui no partilla informasaun ne’e ba ema hotu iha área rurais,” hateten Misato Taki.

Prezidente Komisaun Funsaun Públika (CFP-sigla portugés), Faustino Cardoso. Imajen/Antonio Goncalves

Semináriu ne’e partisipa mós hosi Prezidente Komisaun Funsaun Públiku (CFP-sigla portugés), Faustino Cardoso, hodi halo aprezentasaun kona-ba partisipasaun feto iha polítika no haree mos persentajen hira iha  nivel nasionál.

“Dadus aprezenta katak iha nivel nasionál partisipasaun feto aas 34.6% no iha nivel munisipal mak 32.6% feto partisipa iha Funsaun públika,” informa Faustino Cardoso.

Prezidente KFP informa, oinsá polítika KFP atu promove partisipasaun feto nian liuliu hatán ba dekretu lei númeru 9/2018 kona-ba kuota ba iha kargu diresaun xefia nian, nune’e daudaun Ministériu Administrasaun Estatal (MAE) serbisu hamutuk  ho KFP halo atividade atu oinsá mak sensibiliza importánsia kumprimentu ba kuota nian nivel prezidente Autoridade nune’e mos administrador munisipais no painel júri sira atu sensível kona-ba kumprimentu sensível júri ne’e presiza prezensa feto nian mós.

“Ha’u mós hakarak partilla esperiénsia dezafiu sira ne’ebé mak ita hasoru bainhira ita halo esforsu ida ba promosaun feto iha nivel nasionál nune’e mós iha nivel munisipál,” tenik Faustino Cardoso.

Hosi sorin seluk, diretora ONG FUTURU, Juliana Marcal, hatete Governu Japaun no UN Women fó suporta no apoiu finansiamentu atu  oinsá hakbiit feto iha área lideransa ninian no prepara sira iha desentralizasaun entaun liga ba programa ne’e ho nia objetivu ida katak atu lori hikas inan feton sira ne’ebé mak hetan formasaun durante tinan rua.

Liuhosi treinamentu sira iha posibilidade hodi prepara sira nia aan atu partisipa ba desentralizasaun ne’ebé mak sei mai no bele asume mos kargu xefia prinsipál sira iha sira nia munisípiu ida-idak.

“Ami hanoin katak programa ida ne’e la’ós hotu ba ida ne’e maibé ohin ita nia governu sira balu mós o marka prezensa iha ne’e hodi bele halo kontinuasaun ba sustentabilidade iha área rurais,” hateten Juliana Marcal.

Nia mós afirma, partisipasaun feto ba iha lideransa menus tebes. Maske dekretu lei fó dalan tiha ona maibé to’o agora partisipasaun feto iha nivel suku foin mak atinje 5%. Entaun, tuir nia, hosi  5% ne’e dudu nafatin organizasaun FUTURU bele lori tan programa lideransa inan feton ninian hodi bele enkoraja sira nune’e aumenta tan no fó oportunidade ba sira hodi espresa sira nia abilidade atu bele kompete iha rain rasik.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here