Logotipu SAMES. Imajen/Espesiál

DILI, 18 outubru 2019 (TATOLI) – Ekipa Servisu Autónomu Medikamentu no Ekipamentu Saúde (SAMES), kompostu husi Diretora Interina Konsellu Diretivu, Emília Mendonça akompañadu hosi Xefe Gabinete, Domingos Afonso no Diretór Aprovizionamentu, Nélson Guterres Castro, hasoru malu ho Primeiru-Ministru (PM), Taur Matan Ruak, hodi diskute kona-ba kondisaun jerál ai-moruk hodi responde ba nesesidade komún.

Diretora Interina SAMES, Emília Mendonça, haktuir agora daudaun stock ai-moruk iha armazén hotu, tanba ne’e ekipa informa ba Xefe Governu kona-ba verba saida de’it maka hotu, nune’e Governu prevee tan adisionál millaun $2 husi Fundu Kontijénsia, iha trimestre ikus tinan 2019.

“Orsamentu ida-ne’e SAMES sei utiliza atu asegura ai-moruk ne’ebé mak stock out(hotu) iha armazén SAMES to’o iha aprovasaun orsamentu 2020 nian”, nia tenik iha Palásiu Governu, sesta ne’e.

Nia rekoñese, orsamentu 2019 ne’ebé aloka ba SAMES laiha ona tanba ezekuta hotu molok tinan ne’e ramata, entaun ezekutivu sira iha servisu autónomu ne’e hato’o pedidu ba Governu.

Biban ne’e, nia informa, iha 2019, Governu prevee orsamentu hamutuk millaun $3,7 hodi sosa ai-moruk no husi montante ne’e prosesu aprovizionamentu la’o hotu ona no ai-moruk pursentu 54 maka tama ona armazén, enkuantu pursentu 46 iha hela prosesu nia laran.

“SAMES haree iha prosesu deliberasaun ita hasoru stock out, entaun ita hato’o pedidu maski ezekuta ona pursentu 100 maibé laiha orsamentu atu asegura ba stock out sira. Pedidu ba Governu ne’ebé ami hato’o iha duni rezultadu, entaun ho osan ida-ne’e ami esforsu oinsá maka bele to’o hodi responde ba nesisidade públiku”, nia akresenta.

Emília Mendonça subliña, iha enkontru ne’e, PM Taur fó hanoin ba servisu autónoma ne’e hodi esforsu-aan hadi’a planu rasik, nune’e bele halo kolaborasaun di’ak ho Ministériu Saúde atu bele asegura ai-moruk ba komunidade hotu tuir orsamentu ne’ebé kada tinan Governu prevee ba SAMES.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here