Diretór Informasaun METRO TV, Don Bosco Selahun (klaran), konversa hela ho Prezidente CI, Virgílio da Silva Guterres ho membru CI, Francisco Belo Simões da Costa, hafoin partisipa programa televizivu "Governu Ko'alia" iha Palasíu Governu, kinta (17/10/2019). Imajen/CI

DILI, 18 outubru 2019 (TATOLI)—Atu mídia tradisionál  ne’ebé eziste iha Timor-Leste labele hakat hosi kotuk ho dinámika informasaun rede sosiál nian, importante tebes atu TL inisia ona hasa’e kualidade no hasa’e kompeténsia profisionalizmu jornalista timoroan sira-nian.

Lia hirak ne’e hato’o hosi Diretór Informasaun METRO TV, Don Bosco Selahun, bainhira dadalia ho Ajénsia TATOLI, ohin, iha ámbitu selebrasaun akordu kooperasaun entre Governu Timor-Leste liuhosi Sekretariu Estadu Komunikasaun Sosiál (SEKOMS) ho METRO TV iha Palásiu Governu, Dili.

Notísia Relevante : SEKOMS Asina MoU Ho Metro TV

Don Bosco hateten, importante tebes ba mídia tradisionál sira, inklui rádiu komunitáriu sira atu konsentra iha hasa’e kualidade no kompeténsia profisionalizmu jornalizmu. Nune’e, labele hakat hosi kotuk ho rede sosiál.

Nia hateten, Timor-Leste tenke orgullu tanba Estadu Timor-Leste, liuliu Governu kontinua aposta atensaun ba dezenvolvimentu mídia no kapasitasaun jornalista timoroan sira-nian.

“Dala barak ema dehan, Governu kuandu apoiu mídia no organizasaun jornalista sira, maka sei fó influensia negativa ba independénsia mídia no independénsia asosiasaun jornalista sira-nian. Ida-ne’e, perspetiva ida-ne’ebé la ajuda ita. Ba ha’u, fundu ne’e atu hosi ne’ebé de’it, inklui hosi Governu mós di’ak liután tanba Governu mós iha obrigasaun atu asegura públiku nia interese ba informasaun sira ne’ebé  kualidade,” hateten Don Bosco.

Konseitu mídia, tuir Don Bosco, atu oferese informasaun kualidade ba públiku no konseitu Governu, oinsá mak apoiu mídia ho jornalista sira atu bele elabora no públika informasaun ne’ebé kualidade.

Nia dehan, jornalista sira iha nia kódigu étika rasik, tanba ne’e, atu hetan apoiu hosi sé no hosi ne’ebé de’it, notísia hotu ne’ebé mídia ka jornalista sira hakerek nafatin obedese ba kódigu étika. Tuir Don Bosco, kódigu étika  mak sai hanesan Bíblia ba jornalista sira.

“Se ita jornalista sira serbisu tuir ita-nia kódigu étika,  ita rasik proteje ona ita-nia profisionalizmu, ita proteje públiku no ita proteje ita-nia kredibilidade mídia,” hateten Don Bosco.

Don Bosco afirma tan, forsa mídia ho jornalista sira la’ós tanba nia lidera hosi emprezáriu boot no osan barak ka lidera hosi figura boot sira, maibé forsa jornalista ho mídia mai hosi kualidade ho kompeténsia jornalista.

Intermu Indonézia nian, Don Bosco hateten, Governu fasilita buat barak ba mídia ho asosiasaun jornalista sira, hodi fasilita hasa’e sira-nia koñesimentu no bainhira Konsellu Imprensa Indonézia (DPI/Dewan Pers Indonesia) ho asosiasaun jornalista sira Indonézia nian halo ezame aptidaun (uji kompetensi) ba jornalista sira mós hetan apoiu fundu hosi Governu.

Jornalista: Francisco Simões

Editór: Xisto Freitas

HAKEREK NO HATÁN

Please enter your comment!
Please enter your name here