Sentru Saúde Baoknana, sub Rejiaun Nitibe, Rejiaun Administrativa Espesiál Oekusi Ambenu (RAEOA). Imajen Jogerjo Guterres

OEKUSI, 18 outubru 2019 (TATOLI) – Sentru Saúde Baoknana, sub Rejiaun Nitibe, Rejiaun Administrativa Espesiál Oekusi Ambenu (RAEOA), falta pesoál saúde.

Doutora Maria Metriana. Imajen Jogerjo Guterres

“Tékniku profesionál hanesan médiku, enfermeiru, ho parteira limitadu tebes, tanba ne’e dala barak susar atu halo atendimentu to’o baze”, Maria Metriana Hoar nu’udar médika ba Tatoli iha nia servisu fatin.

Tuir nia kritériu sentru saúde tenke iha médiku haat, parteira haat ho enfermeiru haat, maibé iha sentru saúde ne’e nain rua-rua de’it, la hanesan ho sentru saúde sira seluk.

Iha sentru saúde ne’e mós iha ninia postu saúde haat, ida de’it mak iha médiku, tolu seluk laiha. Enkuantu, postu saúde ida mós parteira laiha, iha de’it mak infermeiru no postu saúde rua seluk hanesan postu Bebo no Ban afi ne’ebé área boot tebes, ne’e iha de’it mak parteira.

Sistema atendementu iha sentru saúde Baoknana, nia dehan iha programa konsuta jerál ho konsulta labarik nian ne’ebé hala’o kada fulan.

Kona-ba pasiente ne’ebé mai ho moras grave, Metriana dehan, baibain halo observasaun iha sentru saúde ne’e, bainhira iha mudansa, entaun halo de’it tratamentu iha ne’e no bele alta.

“Bainhira iha pasiente ne’ebé haree katak, labele duni hodi halo atendimentu iha ne’e, baibain refere ba ospitál referál Oekusi”, Metriana esplika.

Kondisaun sentru saúde Baoknana, sub Rejiaun Nitibe, Rejiaun Administrativa Espesiál Oekusi Ambenu (RAEOA). Imajen Jogerjo Guterres

Konaba pasiente ne’ebé presiza atu halo ezame laboratóriu, sei refere mós ba iha ospitál referénsia Oekusi.

Nia hatutan, balun dala-ruma mai ho kondisaun emerjénsia entaun halo observsaun iha ne’e, no kuandu grave liu, entaun kontaktu kedan ambulánsia no refere direta ba ospitál referénsia.

Maski la temi detalla númeru, maibé infesaun respiratória mak durante ne’e domina, kauza husi kondisaun moris komunidade liuliu rai rahun, ijiene no anin.

Sentru saúde mós sempre halo sosializasaun kona-ba moris saudavel, sempre halo liu husi programa klínika movel. Enfrenta difikuldade transporte, liuliu ambulánsia atu bele tula moras ba ospitál referál, tanba kuaze tinan haat ona karreta multifunsaun iha sentru saúde ne’e la funsiona.

Pesoál saúde sira oras ne’e balun hela iha komunidade nia uma, xefe sentru saúde de’it mós hela fatin laiha, balun hela iha maternidade

“Ita servisu presiza akomodasaun di’ak, hela fatin, nunee ita bele sente seguru no servisu ho konsentrasaun”, nia hakotu.

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here