Sekretáriu Estadu Ambiente, Demétrio do Amaral de Carvalho, emite Sertifikadu lisensiamentu ambientál ba projetu reabilita estrada Baukau to’o Vikeke, Koordenadór Jenerál Tékniku-PMU, MOP, António da Costa Cruz. Imajen/ Florencio Miranda Ximenes.

DILI, 18 outubru  2019 (TATOLI) – Sekretáriu Estadu Ambiente (SEA), Demétrio do Amaral de Carvalho, emite tan  sertifikadu lisensiamentu ambientál ba  proponente 24, kompostu husi grau B  rua no C hamutuk 22.

Proponente ne’ebé simu sertifikadu grau B no C ne’e, konstitui husi kompañia iha área konstrusaun, otelaria no fa’an kombustivel (pertamina).

“Ohin, ita emite sertifikadu lisensiamentu ambientál ba proponente 24, entre lisensa sira ne’e iha kategoria rua mak B no lisensa 22 mak kategoria C”, Demétrio afirma hafoin atribui sertifikadu ba empreza sira iha edifísiu SEA, Bebora, ohin.

Eis Deputadu ne’e hatete Oitavu Governu dezenvolve ona Ajénsia Nasionál Lisensiamentu Ambientál (ANLA) hodi bele fó sertifikadu lisensa ambientál ba kompañia sira ne’ebé sai proponente.

“Lisensa ambientál ne’ebé ita emite ne’e hanesan karta kondusaun ida, ne’ebé ha’u husu ba empreza sira ne’ebé simu ona lisensa atu uza ho responsabilidade tuir regra atu minimiza risku sira ba ambiente, atu sira (empreza) susesu iha sira-nia negósiu, maibé kontribui mós konserva ita-nia ambiente”, sujere.

Koordenadór Jenerál Tékniku Project Management Unit (PMU), Ministériu Obra Públika (MOP), António da Costa Cruz, dehan, ohin MOP mós simu setifikadu lisensiamentu ambientál ba projetu konstrusaun estrada Baukau no Vikeke.

Nia dehan, projetu reabilitasaun estrada Baukau ba Vikeke ne’e presiza duni atu hetan lisensiamentu ambientál husi SEA.

“Ami aprezenta proposta ne’e antes tiha ona, molok halo lansamentu fatuk dahuluk iha agostu foin lalais ne’e, maibé ajénsia ne’ebé fó lisensiamentu ne’e foin estabelese ne’ebé ami presiza hein hodi kumpre regra sira mak lisensa ne’e atraza uitoan”, katak.

Nia dehan rekizitu fundamentál atu hahú konstrusaun projetu ne’e mak tenke iha lisensa. “Ami agradese ba Sekretáriu Estadu Ambiente liuhusi ANLA ne’ebé fó ona lisensa ambientál ba ami atu fásil hala’o konstrusaun no ami sei tuir regra ambientál sira”, nia kompromete.

Tuir lei baze ambientál 2012 artigu 15, hatete projetu boot sira ne’ebé la’o ona antes hetan lisensa ambientál ne’e hatudu inkumprimentu ba lei no prosedimentu sira iha dekretu lei lisensiamentu ambientál númeru 5/2011 ne’ebé hatudu faze sira ba tratamentu lisensiamentu ambientál.

Dezde mandatu Oitavu Governu nian, SEA konsege emite ona lisensiamentu ambientál hamutuk 200-resin ba empreza sira.

Emisaun ba lisensa ambientál ne’e hahú husi simu pose iha jullu 2018 to’o mai 2019 liuhusi Departamentu Verifikasaun Ambientál iha SEA.

Notísia relevante : SEA Emite Ona Lisensiamentu Ambientál 200-Resin ba Empreza Sira

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here