DILI, 18 outubru 2019 (TATOLI)-Sai ona preokupasaun ba sosiedade Timor-Leste, liu-liu hirak ne’ebé horik iha munisípiu, suku ho aldeia, bainhira tinan-tinan iha loron finadu sempre akontese asaltu malu entre grupu juventude sira.
Notísia Relevante : PNTL Bobonaro Sei Fó Posse ba Membru KPK 400
Aktu ne’e halo ema ua’in pániku no trauma. Tanba ne’e, família barak hola medida antesipasaun hodi ba kari ai-funan iha semitériu sira iha dadeer ho meiudia no sira la ba kari iha loraik tanba sente la seguru tanba sempre akontese konflitu iha semitériu laran.
Iha Munisípiu Bobonaro ba finadu, tinan ne’e, Komandu Polisia Nasionál Timor Leste (PNTL) Munisípiu Bobonaro ho FALINTIL-Forsa Defeza Timor Leste (F-FDTL) liuhosi enkontru koordenasaun foin lalais, konkorda ona atu apoiu malu hodi fó seguransa ba komunidade durante loron matebian ka finadu ne’ebé tinan-tinan selebra iha loron 02 novembru.
“Batallaun Orden Públika (BOP) ho F-FDTL sei apoiu ami bainhira mosu situasaun ne’ebé ami presiza,” informa Superintendente Xefe Polisia, Octávio de Araújo Bucar, ohin, via telefone.
Durante enkontru, ekipa PNTL no F-FDTL deskobre, Balibo, Suku Saburai no Holsa iha Postu Administrativu Maliana maka sai fatin risku konflitu ne’ebé bai-bain akontese iha loron matebian. Tanba ne’e, PNTL no F-FDTL sei halo patrullamentu másimu ba fatin hirak ne’e durante serimónia kari ai-funan.
Enkuantu, UPF sei toma responsabilidade seguransa iha fronteira terrestre no tasi iha Munisípiu Bobonaro.
PNTL Bobonaro iha membru efetivu hamutuk na’in 150 tanba ne’e sei jere rekursu ne’ebé iha hodi fó seguransa durante loron boot finadu.
“Ha’u sei la fó lisensa ba membru sira, sira ne’ebé daudaun ne’e lisensa ona sei tama iha loron finadu, depois finadu maka ha’u sei fó lisensa,” Komandante PNTL Bobonaro, Superintendente Xefe Polisia, Octávio de Araújo Bucar.
Jornalista : Agapito dos Santos
Editór : Francisco Simões
