Ministru Defeza, Filomeno da Paixão de Jesus, hala’o enkontru ho Pezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, ohin. Imajen Mídia PR

DILI, 18 outubru 2019 (TATOLI)—Estadu Unidu Amérika sei reabilita Aeroportu Baucau atu tulun nasaun hosi rai-li’ur utiliza ba apoiu umanitária.

Ministru Defeza, Filomeno da Paixão de Jesus, relata asuntu ne’e ba Pezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, ohin.

Nia haktuir, planu reabilitasaun ne’e rezultadu hosi Ministru Defeza halo negosiasaun ho Governu Estadu Unidu iha janeiru 2019 liubá.

“Amerikanu sira hakarak ajuda halo aeroportu iha Baucau. Sei foti osan atu halo infraestrutura. Aeroportu sei entrega totalmente ba ita, la’ós atu entrega fali ba sira. Nasaun sira hosi li’ur sei uza bainhira iha auzíliu umanitáriu hodi fó apoiu ba populasaun,” Filomeno dehan.

Iha enkontru ne’e, Ministru Defeza informa mós kona-ba mandatu Vise-Xefe Estadu Maiór-Jenerál, Falur Rate Laek, ne’ebé terminadu ona iha 1 outubru 2019. Ministru Defeza simu tiha ona proposta hosi Xefe Estadu Maiór-Jenerál ho opsaun tolu ka haat no sei hato’o proposta difinitiva ba Konsellu Ministru.

Aleinde ne’e, Ministru Defeza informa mós kona-ba organizasaun polisiál ninian relasiona ho Komandu Polísia Nasionál Timor-Leste (PNTL) halo serbisu iha terrenu no kontrolu ne’ebé presiza hadi’ak. Komandu iha Dili sei fahe ba eskuadra no komandante ida responsabiliza ba área determinadu ida atu fasilita hakotu situasaun inseguransa ninian.

Governante ne’e haklaken Ministériu Defeza finaliza ona Lei Orgániku, Estatutu no Regulamentu Disiplinár PNTL nian atu haruka ba Konsellu Ministru aprova.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here