Diretora Nasionál Veterinária Ministériu Agrikultura no Peska (MAP), Joanita Bendita da Costa. Foto/Natalino Costa.

DILI, 18 outubru 2019 (TATOLI) – Diretora Nasionál Veterinária, Joanita Bendita da Costa, hateten Ministériu Agrikultura no Peska (MAP) iha semana oin (segunda, 21/10), sei re-enkontru filafali ho liña ministeriál sira atu forma ekipa hodi atribui serbisu ba prevensaun moras Peste Suina Afrikana ka Arican Swine Fever (ASF).

“Ami segunda tuku rua loraik re-enkontru filafali ho liña ministeriál sira atu forma ekipa nune’e mós atribui ona termu referénsia serbisu atu ekipa sira bele hatene ona hodi haree ba idak-idak nian serbisu saida maka ekipa ne’e sei halo”, dehan nia ba Ajénsia Tatoli via telefónika, ohin.

Nia hatutan reuniaun ne’e kontinuasaun foin daudaun nian ne’ebé MAP halo ho liña ministeriál sira hanesan Autoridade Inspesaun no Fiskalizasaun Atividade Ekonómika no Sanitária (AIFAESA), Ministériu Saúde, Alfándega, Kuarentena no Autoridade Seguransa, hodi forma ekipa ba intervensaun prevensaun moras fahi ka ASF ne’ebé afeta ba komunidade sira nian fahi.

Hodi adianta depois re-enkontru, MAP ho liña ministeriál sira liuhosi ekipa tun kedan bá terrenu hodi halo serbisu hanesan MAP ho AIFAESA sei halo inspesaun bá iha loja sira atu haree na’an lata sira ne’ebé fa’an iha loja.

“Depois de re-enkontru ne’e maka ami foin hamutuk ho AIFAESA atu komesa halo inspesaun ba iha loja sira”, dehan nia.

Tuir dadus hosi MAP hatudu katak fahi hamutuk 2.145 maka mate ona tanba kauza hosi moras Peste Suína Afrikana. Dadus hirak ne’e hatudu, Munisípiu Dili, fahi hamutuk 627 maka mate ona, Ermera 860, Lautein 439 no Manatutu 219.

Antes ne’e, Ministru Agrikultura no Peska, Joaquim José Gusmão dos Reis Martins, halo enkontru estraordináriu ho ekipa tékniku Ministériu Agrikultura no Peska (MAP) hamutuk ho liña ministeriál sira hodi husu atu forma ekipa taskforce hodi halo kontrolu másimu ba parte hotu atubele prevene no minimiza moras fahi.

“Ha’u enkontru ho ekipa tékniku hosi Ministériu Agrikultura no Peska inklui liña ministeriál sira atu oinsá hamutuk hodi halo planu atubele forma ekipa taskforce halo prevensaun no minimizasaun ba moras ASF”, dehan ministru foin lalais ne’e.

Nune’e maka presiza halo identifikasaun fatin hodi halo kontrolu, hanesan aeroportu, portu no supermerkadu hodi kontrola hahán sira liuliu hahán lata ne’ebé fa’an iha loja.

Notísia relevante : Fahi Hamutuk 2.145 Mak Mate Ona iha Munisípiu Haat

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here