Sekretáriu Estadu Ambiente, Demétrio do Amaral de Carvalho. Imajen/ Tatoli.

DILI, 18 outubru 2019 (TATOLI) – Sekretáriu Estadu Ambiente (SEA), Demétrio do Amaral de Carvalho, husu ba públiku atu rejeita sosa ai-funan plástiku iha loron finadu (loron matebian) ne’ebé sei monu iha 2 novembru ne’e.

“Ha’u-nia mensajen ba família sira iha Timor-Leste, ita-na matebian sira ita respeitu ho domin sosa fresku ka ita ku’u ai-funan sira ne’ebé kuda iha uma tatis hodi bá tau iha família nia rate. Tanba ita-nia matebian sira mós labele han ai-funan plástiku ne’e no ba rai mós labele”, Demério afirma iha edifísiu SEA, Bebora, ohin.

Nune’e, eis deputadu Parlamentu Nasionál ne’e sujere ba timoroan tomak lalika hola ai-funan plástiku, maski loja balun fa’an.

Dekretu lei ambientál nia seidauk promulga husi Prezidente Repúblika no entra en vigór, SEA seidauk iha podér atu halo inspensaun no intervesaun bá merkadu hodi bandu fa’an ai-funan plástiku.

“Ita só halo mak timoroan hotu rejeita sosa ai-funan plástiku, kada umakain no kada família ka’er ida ne’e hanesan kontribuisaun ba ita-nia ambiente no salva ita-nia terra no halo kontente ita-nia matebian sira bainhira ita harohan”, katak.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here