Estudante ESG Nobel da Paz ne´ebé hetan baku husi ema deskoñesidu. Foto TATOLI: Tomé Amado

DILI, 18 outubru 2019 (TATOLI)-Diretór Eskola Ensinu Báziku Nobel da Paz, Pedro Nunes Menezes informa katak eskola sei fó oportunidade ba estudante na´in rua ne’ebé la partisipa iha ezame lokál tanba hetan agresaun fíziká husi ema deskoñesidu iha área Mascarenhas, hodi substitui sira-nia ezame iha segunda xamada.

“Ha’u-nia estudante na´in rua mak ohin la mai tuir ezame lokál tanba hetan ataka husi ema ka grupu deskoñesidu. Agora sira na’in rua iha hela uma. Ha’u sei fó oportunidade segunda xamada atu sira bele substitui ezame lokál,” dehan Diretór Pedro Nunes ba Ajénsia TATOLI iha nia kna´ar fatin Quintal Boot, sesta (18/10/2019).

Manorin na´in ne´e hateten, Eskola fó oportunidade ba estudante na’in rua ne’e tanba sira hetan agresaun fizika, iha momentu prosesu ezame nia laran. Tan ne’e iha toleránsia segunda xamada ba estudante na’in rua ne’e.

“Sira na´in rua la tuir ezame iha segundu dia ne’e tanba iha justifikasaun hetan insidente. Tanba ne’e eskola iha toleransia”, friza Diretór Pedro Menezes.

Maibé bazeia ba kronolojia akontesementu, Diretór ne’e informa nia rasik la hatene tanba akontesmentu ne’e iha ona estrada públiku. Antes ne’e mosu ona konfrontu iha areadór ne’e entre grupu deskoñesidu sira tuda malu ho estudante Universidade de Dili (UNDIL) maibé estudante Nobel da Paz lahatene buat ida.

Agora ikus mai ninia alunu mak sai vítima ida ne’e mak labele imajina. Kazu ne’e entrega ba familia sira mak sei rejolve no eskola iha obrigasaun atu koopera ho parte seguransa hodi garante nafatin hakmatek ba estudante sira inklui komunidade ne’ebé hela iha área refere.

Notísia relevante:Estudante ESG Nobel da Paz Ida Hetan Agresaun Fízika Husi Ema Deskoñesidu

 Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here