Sekretáriu Estadu Ambiente, Demétrio do Amaral de Carvalho. Imajen/ Tatoli.

DILI, 18 outubru 2019 (TATOLI) – Sekretáriu Estadu Ambiente (SEA), Demétrio do Amaral de Carvalho, hatete bainhira SEA aprezenta politika zero plastiku,  empreza rua hanesan Heineken no Caltech hakarak hala’o resiklajen lixu sai matéria konstrusaun.

“Polítika zero plastiku la’o maka’as, tanba prodús ona lei ambientál no uitoan tan empreza balun atu prodús saku no hatama mai, no loke nafatin oportunidade ba kompañia atu prodús bornál no saku sira husi sura-tahan”, Sekretáriu Estadu Demétrio dehan iha edifísiu SEA, Bebora, ohin.

SEA friza kompañia Heineken no Caltech inklui ajénsia internasioál JICA apoia fundu ba Mercy Corps hodi resikla lixu ba materiál konstrusaun.

Empreza Caltech ne’ebé ho esforsu rasik halo tratamentu ba lixu ka resiklajen ba kaixa mamuk, botir, ákua no mós sunu sasán ospitalár ka medical waste.

“Sira iha intervesaun balun hodi halo resiklajen ba bee, kaixa nomós ákua nia botir sira. Hatene katak ita presiza duni setór privadu partisipa hodi mellora ita-nia ambiente liuliu halo resiklajen”, katak.

Politika zero plastiku ne’e define hanesan prioridade tanba Timor-Leste enfrenta kuantidade lixu plastiku ne’ebé prodús 18% to’o 20%.

Bazeia ba lei baze ambientál númeru 26/2012, lei numeru 2/2017 kona-ba sistema jestaun rezíduu sólidu urbanu no dekretu lei 32/2016 sobre estratéjia melloramentu jestaun lixu urbana sira hasai mós sirkulár ida ba empreza sira atu fó avizu ba kompradór atu hahú utiliza ona pasta amigavel ho ambiente bainhira halo kompra.

Antes ne’e, Ministru Estadu no Presidensiá Konsellu Ministru, Hermenegildo Augusto Cabral Pereira, dehan Governu liuhosi Konsellu-Ministru, aprova rezolusaun Governu ba polítika zero plástiku hodi halo redusaun ba utilizasaun kímiku.

“Governu liuhosi Funsaun Públika atu hahú fó ezemplu di’ak, atu to’o tempu bele jeneraliza área seluk liuhosi Sekretáriu Estadu Ambiente”, katak.

Polítika Zero plastiku ne’e, Ágio dehan tanba konsidera poluisaun ne’ebé mosu, provoka hosi utilizasaun protudu kímiku nu’udar dezafiu prinsipál ba umanidade no ambiente.

Polítika ne’e mós oinsá atu bandu no regulariza servisu hodi uza plástiku kímiku iha fatin servisu.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here