Konsellu Imprensa (CI-sigla Portugés) halo enkontru kortézia ho PPN Arão Noe de Jesus Amaral iha Gabinete PPN, kinta (17/102019). Imajen/CI

DILI, 18 outubru 2019 (TATOLI)—Konsellu Imprensa (CI-sigla portugés) husu ba Prezidente Parlamentu Nasionál (PPN), Arão Noe de Jesus Amaral, atu tatoli ba membru Parlamentu Nasionál (deputadu sira)  uza direitu ba resposta kona-ba publikasaun mídia komunikasaun sosiál nian ne’ebé afeta ba deputadu sira-nia deklarasaun ka notísia balun ne’ebé la balansu hodi ofende deputadu sira.

Prezidente CI, Virgílio da Silva Guterres, aprezenta sujestaun ne’e liuhusi soru-mutuk ho PPN, iha  Gabinete PPN, kinta lorokraik (17/10/2019. Enkontru kortézia ne’e akompaña mós hosi Deputada Rosalina Ximenes no membru CI, José Maria Ximenes, Paulo Araújo da Cruz, Francisco Belo Simões da Costa ho mós Angelina Gusmão nu’udar funsionáriu ezekutivu CI nian.

Iha Lei Komunikasaun Sosiál, kapítulu V, artigu 34 “Kondisaun Sira Efetivasaun Nian”  iha númeru ida (1) to’o númeru ualu (8) asegura direitu ba resposta no ratifikasaun bainhira mídia sira publika la tuir faktu, la balansu, la rigór no la kumpre kode étika jornalístika nian.

CI foto hamutuk ho PPN Arão Noe de Jesus. Imajen/CI

Asuntu importante seluk mak partilla ho PPN Arão Noe de Jesus Amaral iha soru-mutu ne’e mak progresu serbisu no dezafiu sira ne’ebé mak CI enfrenta durante nia mandatu hosi tinan 2016 to’o mai 2019, inklui informa mós ba PPN kona-ba mandatu ikus membru CI nian ne’ebé atu termina iha 10 maiu 2020.

Biban ne’e, Prezidente CI, Virgílio da Silva Guterres, propoin ba PPN atu bele marka sesaun plenária ida hodi CI bele aprezenta serbisu sira ne’ebé mak durante ne’e halo ona no husu apoiu hosi PPN atu bele iha mós enkontru entre CI  ho komisaun Parlamentu Nasionál sira.

Hatán ba pedidu sira ne’e, PPN Arão Noe de Jesus hateten, tuir Lei haruka tinan-tinan CI iha obrigasaun atu aprezenta programa serbisu iha plenária PN, maibé durante tinan tolu PN la ordena plenária ho CI tanba situasaun polítika no nesesidade serbisu seluk ne’ebé obriga PN tenke foku atensaun.

“Ita sei buka tempu molok na’in hira nia mandatu termina, bele halo plenária ida ho ita-boot sira atu mai aprezenta serbisu saida de’it mak CI halo ona. Maibé, antes ne’e, ita-boot sira bele haruka uluk relatóriu  ida mai ami atu bele fahe ba deputadu sira estuda molok ita-boot sira mai aprezenta iha plenária,” hateten Arão Noe de Jesus Amaral.

Tuir observasaun PPN nian katak serbisu CI nian durante ne’e di’ak no iha implikasaun pozitivu tebes ba  dezenvolvimentu mídia iha Timor-Leste, liuliu iha konteúdu jornalizmu nian.

“Iha 2016 bainhira atu estabelese Lei Komunikasaun Sosiál hodi hamosu CI mosu pro-kontra. Maibé, realidade ho CI nia prezensa ita haree mídia sira nia produtu jornalístiku komesa di’ak ba beibeik, mezmu sei iha mídia ida ka rua mak sei gosta halo propaganda no bombástiku. Ami iha PN sempre akompaña no ami haree ita-boot sira-nia serbisu di’ak tebes no kontinua serbisu ba oin nafatin,” nia hateten.

Buat ne’ebé PPN Arão Noe de Jesus aseita ho CI mak maski mandatu atu termina ona, maibé presiza liu mak iha memória institusionál, katak  se biban, di’ak liu entre membru na’in lima ne’e, na’in tolu bele fila-fali ba retoma mandatu, maibé depende mós ba desizaun organizasaun sira ne’ebé nomea membru CI sira.

Buat ne’ebé sai preokupasaun boot ba CI durante mandatu no sai mós preokupasaun globál nian mak hoax ho diskursu ba ódiu (hate speech)   iha mídia sosiál, tanba ne’e, CI kontinua komunika ho  Governu liuhosi  Sekretáriu Estadu Komunikasaun Sosiál atu oinsá mak elabora enkuadramentu legál ruma ne’ebé la perturba liberdade imprensa ho liberdade espresaun iha artigu 40 ho 41 Konstituisaun RDTL.

CI mós informa ba PPN kona-ba kooperasaun internasionál sira ne’ebé mak durante ne’e estabelese ona, inklui mós Deklarasaun Bangkok ne’ebé Konsellu Imprensa hosi nasaun haat; Tailándia, Indonézia, Myanmar ho Timor-Leste konkorda estabelese rede Konsellu Imprensa Sudeste Aziátiku, ne’ebé mak tuir planu sei ofisializa iha simeira internasionál Bali Demokrasia Fórum ne’ebé tinan-tinan hala’o iha fulan dezembru iha Bali.

Relasiona ho vizita CI nian ba Bangkok, Tailándia, foin lalais ne’e, Prezidente CI mós informa ba PPN kona-ba mensajen balun iha enkontru rede CI Sudeste Aziátiku nian ho Prezidente PN Tailándia,  Chuan Leekpai, ne’ebé ‘iha interese’ hakarak vizita Timor-Leste.

Chuan Leekpai, nu’udar Primeiru-Ministru iha tinan 1997-2001, foti desizaun hodi haruka forsa defeza Tailándia nian mai Timor-Leste iha misaun INTERFET 1999-2001. Desizaun ida-ne’e, Estadu Tailándia konsidera hanesan  primeiru desizaun ne’ebé Estadu Tailándia foti iha sira-nia istória hodi haruka sira-nia forsa ba apoia rai seluk.

Jornalista: Francisco Simões

Editór: Xisto Freitas

HAKEREK NO HATÁN

Please enter your comment!
Please enter your name here