Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen/Egas Cristóvão

ATSABE, 18 outubru 2019 (TATOLI) – Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, sei hala’o vizita iha sítiu turistiku sira iha postu administrativu Atsabe, Munisípiu Ermera, hodi haree diretamente fatin prioridade sira ne’ebé maka persiza atensaun hosi Governu.

“Turizmu hanesan setór importante ida, aban dadeer (19/10), ha’u hakarak bá haree bee-mutin, no fatin turístiku sira iha Batumanu no anota hotu para tinan tuirmai bele halo buat ruma. Tanba iha Ermera iha poténsia ba kafé modo no mós iha turizmu importante tebes”, hateten MKAE interinu ne’e iha âmbitu lansamentu ba Programa Naroman ba Suku iha suku Batumanu, postu administrativu Atsabe, Munisípiu Ermera, ohin.

Ministru Turizmu, Komérsiu no Indústria (MTKI) ein funsaun ne’e afirma, Governu identifika ona fatin turizmu sira atu dezenvolve mak hanesan Kablaki iha Munisípiu Manufahi, fatin ida iha Postu Administrativu Letefoho-Ermera, Maubara Mnisípiu Likisá, no iha nasionál (Dili).

“Fatin hirak ne’e prioridade iha tinan 2020, maibé ita-boot sira (Atsabe) ami sei rejista hotu hodi tau ba programa MTKI iha tinan sira mai”, dehan Fidelis.

Governante ne’e husu ba autoridade lokál no komunidade sira atu hamutuk ho nia hodi bá vizita fatin turizmu sira ne’ebé poténsia iha Atsabe.

Jornalista : Antónia Gusmão
Editor : Maria Auxiliadora

HAKEREK NO HATÁN

Please enter your comment!
Please enter your name here