Doutora Maria Metriana. Imajen Jogerjo Guterres

OEKUSI, 17 outubru 2019 (TATOLI) – Pesoál Saúde iha sentru saúde Baoknana, sub rejiaun Nitibe, Rejiaun Administrativa Espesiál Oekusi Ambenu (RAEOA), preokupa balada sira nian movimentu iha área edifísiu sentru saúde ne’e rasik.

Situasaun ne’e difikulta tebes pesoál saúde sira, tanba fahi, bibi no karau ne’ebé la’o ba mai bele hadaet mós moras ba pasiente no pesoál saúde sira ne’ebé lorloron hela no hala’o servisu iha fatin ne’e.

Doutora Maria Metriana hateten durante tempu naruk ona mak sentru saúde ne’e laiha lutu. “Ami hela hamutuk ho balada sira ne’ebé movimentu ba mai, dala ruma fahi mos tama ba sentru laran bainhira ita la taka odamatan. Ida ne’e tuir loloos labele, tanba balada sira bele hadaet mós moras oioin”, Metriana hateten.

Kondisaun reál sentru saúde Baoknana. Imajen Jogerjo Guterres

Nia hatutan, hanesan pesoál saúde dala-ruma ba halo kampaña iha komunidade atu moris moos, maibé parte sentru saúde rasik balada sira halo movimentu.

Preokupasaun ne’e hato’o ona ba Ministeriu Saúde no mós ba Sekretaria Rejional Asuntu Saúde RAEOA.

Metriana hatutan, oras ne’e besik tempu udan, balada sira kontinua movimentu, sei prejudika mos pesoál saúde inklui pasiente sira iha sentru saúde ne’e.

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here