Estudante CSAO bainhira partisipa ezame nasionál. Imajen Jogerjo Guterres

OEKUSI, 17 outubru 2019 (TATOLI) – Profesór husi eskola públiku no privadu iha Rejiaun Administrativa Espesiál Oekusi Ambenu (RAEOA) otimista, finalista sira ne’ebé partisipa ezame nasionál tinan ne’e sei pasa hotu.

Joaquim do Rego Fatima de Andrade, Moderadór iha Koléjiu Santu António Oekusi. Imajen Jogerjo Guterres

Joaquim do Rego Fatima de Andrade hanesan profesor dixiplina Jeografia, hanesan mós moderadór iha Koléjiu Santu António Oekusi (CSAO-sigla portugés), hateten konsellu manorin sira halo preparasaun liuhusi oferese matrikulasaun no halo akompañamentu molok alunu sira hasoru ezame.

Preparasaun sira ne’e, nia dehan hetan partisipasaun ativu hosi alunu sira. “Ha’u fiar katak hamutuk Maromak no Santu António nia harohan daet, alunu sira ne’ebé partisipa ezame nasionál sei pasa 100 pursentu’’, Juaquim afirma ba Tatoli iha ninia servisu fatin.

Totál estudante finalista husi eskola ba tinan ne’e hamutuk 183, fahe ba departementu siénsia sosiál no umanidade  78, siénsia teknolojia multimedia 75. Laiha ida mak auzénsia, durante ezame.

Adjuntu diretór Eskola Téknika Agrikola Kay Rala Xanana Gusmão Oekusi, Rui Manuel de Jesus Hornay. Imajen Jogerjo Guterres

Iha sorin seluk, adjuntu diretór Eskola Téknika Agrikola Kay Rala Xanana Gusmão Oekusi, Rui Manuel de Jesus Hornay, hateten eskola ne’e iha finalista nain 12 mak paritisipa ezame nasionál.

Nia garante katak, estudante sira preparadu no sei pasa hotu iha ezame nasionál ba tinan ne’e, mesmu eskola ne’e hasoru difikuldade oioin durante prosesu aprendizajen.

Estudante 2.239 iha RAEOA Partisipa Ezame Nasionál

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here