Sekretáriu Estadu Protesaun Sivíl, Alexandrino Xavier Araújo (Karuk), Ministru Defeza no Ministru Interior Interinu, Filomeno da Paixão de Jesus (Klaran) ho UN Rezidente Koordenadór iha Timor-Leste Roy Trivedy (Loos), halo abertura ba seminariu internasionál “Enkuadramentu Legál ba Sistema Protesaun Sivíl iha Timor-Leste”, Kinta (17/10/2019). Imajen/Nelson de Sousa

DILI, 17 outubru 2019 (TATOLI)-Governu liuhosi Sekretáriu Estadu Protesaun Sivíl, Alexandrino Xavier Araújo, apela nafatin ba parseiru internasionál sira atu hametin liután lasu kooperasaun hodi dezenvolve área protesaun sivíl.

Notísia Relevante: SEPS Realiza Konferénsia Internasionál ba Sistema Protesaun Sivíl

Nia orgullu ho apoiu parseiru dezenvolvimentu husi nasaun Japaun, Korea do Súl, Xina, Austrália, Portugal, Nasaun Unida, Uniaun Europeia no organizasaun  internasionál, Cruz Vermella Timor-Leste (CVTL-sigla portugés) no seluk tan, tanba  fó ona apoiu ba instituisaun liuliu ba protesaun  no sokorru bainhira mosu dezastre naturaís iha territóriu, formasaun rekursu umanu ba korpu Bombeiru.

“Husu parseiru sira  atu tau fiar nafatin ba Timor Leste  hodi bele aumenta no hametin kooperasaun,” hatete  Sekretáriu Estadu, Alexandrino Xavier Araújo, iha ámbitu   konferénsia internasionál ho tema ‘’Importánsia enkuadramentu legál ba sistema protesaun sivíl iha Timor Leste’’, ohin, iha salaun Ministériu Solidariedade Sosiál no Inkluzaun (MSSI), Caicoli, Dili.

Nia rekoñese ho apoiu husi parseiru nasionál no internasionál ne’e maka kontribui nesesidade instituisaun nian liuliu ba protesaun no asisténsia ba vítima dezastre naturaís iha territóriu durante ne’e.

“Ha’u hakarak  hato’o  agradese  ba imi hotu nia apoiu ba  Timor Leste,” afirma Alexandrino de Araújo.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here