Finalista 12 husi Eskola Téknika Agrikola Kay Rala Xanana Gusmão Oekusi (ETA-KARAXAGO), prenxe formuláriu hosi UNTL no IPB. Imajen Jogerjo Guterres

OEKUSI, 17 outubru 2019 (TATOLI) – Finalista nain 12 husi Eskola Téknika Agrikola Kay Rala Xanana Gusmão Oekusi (ETA-KaRaXaGo), prenxe formuláriu atu asesu ba Universidade Nasionál Timor Lorosa’e (UNTL) no Institutu Politekniku Betanu (IPB).

Adjuntu diretór Eskola Téknika Agrikola Kay Rala Xanana Gusmão Oekusi, Rui Manuel de Jesus Hornay. Imajen Jogerjo Guterres

Adjuntu diretór ETA-KARAXAGO, Rui Manuel de Jesus Hornay, hateten semana ida antes ezame nasionál, tékniku sira husi Ministériu Ensinu Superiór mai halo sosializasaun iha eskola ne’e, liuliu oinsá asesu ba ensinu superior liuliu iha universidade Públika UNTL ho IPB.

Adjuntu ne’e informa, loron 14-15 fulan-ne’e finalista sira hala’o ezame nasionál, no iha 16 sira prenxe formuláriu oinsá mak bele asesu ba UNTL no IPB. Desimu segundu anu husi eskola ne’e, ne’ebé prenxe formuláriu feto haat no mane ualu.

Rui hateten, atu fasilita estudante finalista sira hodi asesu ba ensinu superiór maka, tinan-tinan eskola ne’e sempre halo kooperasaun ho UNTL no IPB no kooperasaun ne’e la’o to’o ohin loron. Husi eskola ne’e rasik, tinan kotuk pasa nain 10, UNTL nain haat, no IPB nain neen.

Kona-ba kualidade alunu sira nian, Rui konfesa, konstrusaun fíziku, dezenvolvimentu kuríkulu, profesór nu’udar fatór importante ba kualidade.

Maski nune’e, atu asesu ba UNTL adjuntu ne’e garante, alunu sira husi eskola ne’e fasíl tanba esperiénsia hatudu ona, kada tinan sempre iha alunu ne’ebé asesu.

Rui esplika estatutu husi eskola ne’e rasik hamahan án iha Ministériu Agrikultura no Peska (MAP), maibé ho lei númeru 3/2014, eskola ne’e hamatan án iha Rejiaun Administrativa Espesiál Oekusi Ambenu (RAEOA), Sekretaria Rejionál Asuntu Agrikultura no Dezenvolvimentu Rurál.

Ho estatutu ne’e maka eskola ne’e rasik hala’o atividade ketak husi eskola sira seluk, liuliu kona-ba atendimentu sira, alunu sira barak maka falta meiu atu halo prátika, tanba kuaze tinan tolu ona la asesu ba buat hirak ne’e.

Nia dehan, antes ne’e iha alunu lubuk ida mak mai husi munisípiu seluk, maibé ho kondisaun ne’e to’o ohin loron ema fila hotu, no trensfere hotu ba Maliana no Natarbora.

Parte eskola mós relata ona ba parte Sekretária Rejionál Asuntu Agrikultura no Dezenvolvimentu Rurál no hein de’it prosesu.

Oras ne’e daudaun, alunu iha eskola ne’e rasik hamutuk 70 resin, kompostu husi primeiru to’o terseiru anu ho profesór 22, inklui kondutór no lojístiku.

Durante ne’e estudante sira uza sala haat, fatin ba Informasaun no Teknolojia (IT) no biblioteka.

Kada fulan, estudante sira husi eskola ne’e oferese kontribuisaun dolar lima, ne’ebé bele fasilita eskola atu utiliza hodi fó apoiu ba alimentasaun, tanba estudante sira hela hamutuk iha uma ida (koléjiu).

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here