Broxura "Open Casting" filme Bara & Luka

DILI, 17 outubru 2019 (TATOLI)—Produtór Cakrawala Media Film iha Indonézia, Roy Wijaya, hateten nia adapta Novela “Bara & Luka” no “Cinta Pertamaku Nomor 11” ne’ebé hakerek husi eskritora feto, Devinarti Seixas, husi Timor-Leste sai filme.

Produtór Cakrawala Media Film iha Indonézia, Roy Wijaya

Tanba, nia hateten, filme ida ne’e tanba atu foti fila fali istória memória pasada sai hanesan meius aprendizajen ida ba povu Timor-Leste. Katak, atu hetan ukun rasik-aan ne’e la’ós fasil maibé tenke liuhusi luta naruk ida ne’ebé ekstraordináriu ho domin ida ne’ebé kle’an.

Konsetualmente iha siénsia komunikasaun nian, nia hatutan, nia iha interese foti istória funu-sívil (perang saudara) ne’ebé eskritora hakerek bazeia ba nia aman nia istória pasada, nu’udar filme edukativu ida ne’ebé ho objetivu atu muda ema ida-nia lala’ok kognitivu, afektivu, no mós psikomotoriku.

Kognitivu katak abilidade ne´ebé kompoen iha atividade mentál nian (kakutak) hanesan koñesimentu, komprensaun, implementasaun, analize, sínteze no evaluasaun. Afetivu ne´e buat ne´ebé iha relasaun ho atitude no valór hanesan emosaun, interese no sentimentu. Enkuantu, psikomotoriku ne´e signifika buat ne´ebé ligasaun ho abilidade ema nian bainhira hetan esperiénsia estudu determinadu ruma (komprende buat ruma).

“Objetivu prinsipál husi filme ne’e mak fó ezemplu ka sai modelu liuhusi meius edukativu. Filme ne’e la’ós hanesan istória ida husi novela leet de’it maibé iha imajen reál liuhusi meius vizualizasaun ne’ebé tomak no forte. Katak, Timor-Leste ne’e hadeer no hamriik nu’udar futuru ba jerasaun foun sira ne’ebé matenek no forte,” dehan Produtór Filme, Roy Wijaya, ba Ajénsia TATOLI liuhusi entrevista via rede sosiál (wa), kinta (17/10/2019).

Nia haktuir, nia iha interese halo filme ida ne’e tanba nia iha ligasaun di’ak ho eskritora ne’ebé sira hamutuk iha Komunitas Penulis Kreatif. Nia halo komunikasaun di’ak ho eskritora ne’e hodi fó inspirasaun no hametin ligasaun la’ós tanba buat interesante de’it, maibé iha relasaun metin ho liafuan sira atu apoia malu no susesu hamutuk iha mundu filme nian iha loron aban nian.

Filme ne’e susesu ka lae, tuir nia, la’ós termina husi produtór (sutradara), autór sira ne’ebé halimar filme ne’e ka eskritór/a sira de’it. Maibé, filme ne’e hetan susesu nia sasukat mak to’o iha ne’ebé populasaun ka povu Timor-Leste simu filme ne’e hanesan matéria aprendizajen ne’ebé tenke moris banati iha segmentu moris [ema] ida-nian.

“Buat ne’ebé importante mak Governu Timor-Leste mak tenke apoiu, ne’ebé iha kapasidade polítika ida halo sensibilizasaun ba filme rua ne’e ba entidadestomak hanesan filme ida ne’ebé merese atu hetan apresiasaun,” nia dehan.

Razaun, nia esplika, tanba poténsia filme hanesan mídia ida ne’ebé bele hato’o mensajen (mídia komunikasaun) edukasaun efetivamente no iha kapsidade bele afeta be ema barak nia lala’ok moris. Bainhira ko’alia kona-ba filme mak sena (adegan), diálogu, akontesimentu, konflitu, figura, autór sira, no setting (fatin) sira ne’e mak forma iha ema ida-nia hanoin.

“Filme edukasaun nu’udar filme istória ho ninia objetivu ne’ebé klaru atu hatudu sena ida ne’ebé bazeia ba realidade sosiedade ida-nia moris loro-loron. Filme edukasaun nu’udar filme ida ne’ebé fó importánsia liu ba sentimentu duke valór ne’ebé ninia objetivu ida mak atu forma sidadaun sai ema ne’ebé matenek iha nasaun ida-nia laran,” Roy Wijaya esplika.

Ba filme ida ne’e, nia dehan, sira husi parte Kompañia Cakrawala Media Film Jakarta-Indonézia selebra tiha ona prosesu hala’o casting no hili autór sira seluk, alende hili eskritora Novela “Bara & Luka” Devinarti Seixas sai hanesan autora prinsipál (pemeran utama).

Tuir nia, tanba filme ida ne’e filme-badak ne’ebé sei utiliza nu’udar filme edukativu ida ne’ebé sei priense durasaun tempu maksimál to’o minutu 45 de’it. Tanba, nia informa, totál scene hamutuk 35 scene ne’e sei kobre orsamentu maizumenus ho orsamentu montante boot (Rp.112.000.000 resin).

Tuir planu, nia informa, bainhira filme ne’e halo produsaun ramata ona mak sei tuir festivál iha Festival Film New York no Asian nian iha 2020 be mai. Loloos, se produsaun halo ramata lalais karik, filme ne’e sei bele tuir Festival Film Indonesia (FFI) iha Dezembru 2019. Maibé, agora filme ne’e labele hili ka nomeia hodi tuir festivál refere tanba rejistrasaun ba festivál ne’e taka tiha ona.

Notísia relevante:Eskritora Feto Timór Nia Novela “Bara &Luka” Sei Adapta Ba Filme

Jornalista: Cancio Ximenes

Editór: Rafy Belo

HAKEREK NO HATÁN

Please enter your comment!
Please enter your name here