Komandante Jerál PNTL, Faustino da Costa. Imajen Tatoli/Cipriano Colo

DILI, 17 outubru 2019 (TATOLI)—Kinta ne’e, Komandante Polísia Nasionál Timor-Leste (PNTL), Komisáriu Faustino da Costa, atualiza akontesimentu sidadaun ida ho inisiál CDJ tenta soke aviaun ho motór ba Prezidente Repúblika (PR), Francisco Guterres Lú Olo.

“Ohin mai atualiza ba Prezidente Repúblika oinsá hosi primeiru ema ne’e la’o to’o ba iha ne’ebá no saida mak parte PNTL nia obrigasaun atu halo ba kazu ne’e. Ida-ne’e mak atualiza hotu ona ba Prezidente Repúblika,” tenik Faustino ba jornalista sira iha Palásiu Prezidente Nicolau Lobato, Bairru Pité.

Lee mós: Ho Motor Atu Soke Aviaun ba Para iha Prizaun Preventiva

Tanba kazu ne’e sériu, liuliu amesa ida ba Estadu, PNTL liuhosi Komandu Jerál foti ona desizaun hodi hasai órden ba ekipa ida atu halo inspesaun ba membru PNTL ne’ebé serbisu iha ne’ebá.

“Iha ne’ebá, ita hotu hatene Polísia oin rua mak serbisu iha ne’ebá. Polísia oin rua ne’e, ida hosi Unidade Patrollamentu Fronteira no ida seluk hosi Komandu Munisípiu Dili. Entaun, ekipa ne’e ba halo inspesaun ba membru Polísia hosi unidade rua ne’e. Ida-ne’e mós ohin ha’u aprezenta hotu ba Prezidente Repúblika,” Fautino haktuir.

Entretantu, hosi akontesimentu ne’e, hanesan mós alarma ida ba parte seguransa atu halo serbisu másimu liu. Nune’e, Komisáriu ne’e haklaken, nia ko’alia ona ho Ministru Interiór Interinu, Filomeno Paixão de Jesus atu aumenta tan númeru PNTL iha fatin refere.

“Klaru, ida-ne’e mak ha’u aprezenta ona ba ministru atu aumenta tan Unidade Patrollamentu Fronteira no Polísia Munisípiu Dili no mós tenke alarga tan postu rotunda,” nia sublinña.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here