Estudante ESG Nobel da Paz ne´ebé hetan baku husi ema deskoñesidu. Foto TATOLI: Tomé Amado

DILI, 17 outubru 2019  (TATOLI)-Estudante Ensinu Báziku terseiru siklu husi Eskola Sekundária Jerál (ESG), Nobel da Paz ho inisiál MSG ne´ebé hetan baku husi ema deskoñesidu iha área fronteira entre Quintal Boot no Mascarenhas kontinua internadu iha sala emerjénsia Ospitál Nasionál Guido Valadares (HNGV) tanba hader la di´ak.

Estudante ho inisiál MSG ne´e husi Munisípiu Baucau, Postu Administrativu Vemase, Suku Uaegae no agora daudaun hela iha suku Fatuhada, área Ai-mutin.

Kronolojia ba akontesimentu ne´e, tuir sasin ida ho inisiál AS katak nia hamutuk ho vítima foin partisipa ezame nasionál ramata no hein mikrolete atu fila ba uma.

“Ami na´in rua la´o sai lidun Defensória Públiku nian, kolega estudante Nobel da Paz sira mós barak los iha li´ur hein hela mikrolet entaun ami na´in rua mós sikat tan iha le’et,” haktuir Ajénsia TATOLI, iha HNGV, Bidau Toko Baru, ohin.

Estudante ne´e hatutan, derepente ema lubuk ida deskoñesidu hakat mai hodi hateten ba sira katak: “Imi jagoan ka? Maibé nia (sasin) hatan ba ema sira ne’e katak ami la jagoan ida maun sira. Ami mai atu eskola hodi buka matenek”.

Maske nune´e, tuir nia, ema  ne´e sente la satisfaz no ba vítima ne´ebé la preparadu hodi tuku kedas vítima, depois tebe tan nia ibun tanba ne´e rezulta vítima monu husi trotoár leten tuun ba rai ku´ak naruk aredór defensória públika nian.

Sasin ne´e informa tan katak vítima hetan kanek grave iha ninia oin parte tilun karuk tanba pankada maka´as iha fatuk no rezulta ran sai halo vítima desmaia iha fatin. Haree akontesementu ne’e nia haksoit tuun kedan hodi salva vítima atu labele fó impaktu ba ninia kondisaun fízika.

Tuir mai, estudante sira seluk mai fó tan apoiu, sira para taksi hodi tula vítima mai HNGV. Agora daudaun vítima hetan ona tratamentu intensivu iha sala emerjénsia maibé nia seidauk bele fila tanba hader ladi´ak.

Ho kondisaun ne´e, família husi vítima, Beatriz Viquinha ba TATOLI hateten, vítima sente ninia ulun ho isin mak moras hotu tanba ne’e parte ospitál seidauk fó lisensa atu fila maibé rezultadu Raiu-Xis nian laiha problema.

Iha HNGV, Ajénsia TATOLI tenta konfirma ho xefe departementu emerjénsia maibé seidauk iha posibilidade tanba okupadu.

Notísia relevante:Estudante ESG Nobel da Paz Ida Hetan Agresaun Fízika Husi Ema Deskoñesidu

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here