EBF Aiasa, Balibo, Bobonaro, ne'ebé anin sobu, foin lalais ne'e. Imajen/António Gonçalves

DILI, 17 outubru 2019 (TATOLI)- Diretór Nasionál Asuntu Sosiál Eskolár (DNASE), Ministériu Edukasaun, Juventude no Desportu (MEJD), Belchior Maria Almeida Guera prokupa tanba materiál emerjénsia atu apoiu  eskola sira ne’ebé afetadu ba dezastre naturál laiha ona.

“Ami laiha ona stock emerjénsia atu apoiu eskola sira ne’ebé afetadu ba dezastre naturál tanba ami agora daudaun buka konsolida hela atu hetan netik osan uitoan ba fulan rua nia laran,” dehan DNASE, Belchior Barros Guera ba Ajénsia TATOLI, iha nia kna´ar fatin, MEJD, Vila Verde, Dili, ohin.

Diretór Belchior Barros Guera relata ninia parte simu tan dadus eskola ensinu baziku lubuk ida ne’ebé hetan problema tanba kauza husi dezastre naturál.

Eskola ensinu báziku mak hanesan iha Maliana Aiasa, Same iha Manus,Manatutu, Baucau (Queliqai) ne’e afeta husi anin boot. Kondisaun eskola sira ne’e anin loke hotu kakuluk.

“Ami simu ona dadus sira ne’e maibé preokupasaun ami nian mak materiál emerjénsia hotu ona maibé oinsa mak ami bele hetan fali osan hodi halo fali kompra. Ida ne’e mak dirasaun buka hela meius”, friza Diretór Belchior Barros Guera.

Nia afirma DNASE hakarak lalais atu atende situasaun emerjénsia ba eskola kuaze ensinu bázíku sira ne’e, hodi fulan novembru tinan ne’e estudante sira bele tuir ezame lokál ho di´ak.

Eskola ensinu bázíku sira ne’e  balun halo iha tempu Programa Pakote referendum nian no kondisaun sira estraga hotu ona. Ne’e duni kuandu semana ne’e mak DNASE hetan netik apoiu sei lalais halo kedan atendementu.

Notísia relevante:Anin Sobu Eskola Bázika Filiál Aiasa Balibo

Jornalista : Tomé Amado

Editór    : Rafy Belo

HAKEREK NO HATÁN

Please enter your comment!
Please enter your name here